Azərbaycan, Bakı, 22 noyabr /Trend, müxbir N.İsmayılova/
Azərbaycan bankı "Royal Bank" ölkədə ipoteka kreditləşməsi bərpa olunduqdan sonra (2009 iyun) ölkənin Mərkəzi Bankı yanında fəaliyyət göstərən Azərbaycan İpoteka Fondunun (AİF) xətti ilə ümumi dəyəri 12,63 milyon manat olan 287 ipoteka krediti verib. Bu barədə bazar ertəsi bankdan deyiblər.
"Bu günə bank ümumi məbləği 10,59 milyon manat olan 245 standart ipoteka krediti, eləcə də 1,4 milyon manat məbləğində güzəştli şərtlərlə 42 kredit verib", - bankdan deyiblər.
Bankın kredit portfelinin məcmu həcmi bu günə 122 milyon manat təşkil edir.
AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcəsi ilə 30 il müddətinə verilir. Adi və güzəştli kreditlər üçün ilkin ödəniş 15 faizdir.
Kreditlər milli valyutada - manatla və yalnız Azərbaycan vətəndaşlarına verilməlidir; ipotekanın predmeti yalnız mənzil və şəxsi evlər ola bilər; ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir; kreditə görə aylıq ödəniş borc alanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə; ən azı üç il iş təcrübəsi olan dövlət qulluqçularına; elmlər namizədləri və doktorluq dərəcəsi olanlara; idman sahəsində xüsusi xidmətləri olan şəxslərə; maksimum üç il xidmət stajı olan hərbçilərə şamil edilir.
