Azərbaycan, Bakı, 1 dekabr /Trend, müxbir H.Vəliyev/
Bu gün Azərbaycanın poçt rabitə operatoru "Azərpoçt"un likvidliyi və aktivləri ölkədə fəaliyyət göstərən bankların səviyyəsi ilə uyğun deyil. Bu da maliyyə xidmətlərinin göstərilməsində operatorun başlıca problemidir. Bu barədə Bakıda keçirilən iclasda Azərbaycanın rabitə və informasiya texnologiyaları naziri Əli Abbasov deyib.
"Ona görə də, Azərbaycan Mərkəzi Bankının tövsiyyələrinə əsasən, poçt operatoru ilkin mərhələdə ölkənin bank bazarının liderlərindən biri ilə müqavilə bağlamalıdır. Bu, poçt təşkilatlarına artıq 2011-ci ildən mikrokreditləşdirmə xidmətləri göstərməyə imkan verəcək", - Abbasov bildirib.
Operatorun likvidliyinin artmasından sonra "Azərpoçt" bu xidmətləri müstəqil olaraq göstərəcək.
AMB idarə heyətinin sədri Elman Rüstəmovun sözlərinə görə, maliyyə xidmətlərinin inkişafı layihəsi böyük perspektivlərə malikdir. O, elektron kommersiyanın, təhsil sisteminin inkişafına yardım edir və interaktiv təhsil xidmətləri göstərilməsi üçün imkanlar açır.
"Ümumilikdə bu layihənin həyata keçirilməsi respublikada maliyyə sektorunun dərinləşməsinə, eləcə də ucqar kənd və regionların əhalisi üçün maliyyə xidmətlərinə çıxışın genişləndirilməsinə imkan verir", -Rüstəmov bildirib.
Onun sözlərinə görə, bu layihə ölkənin maliyyə sektorunda rəqabəti artıracaq və maliyyə resurslarını iqtisadi dövriyyəyə cəlb edəcək.
Poçt rabitəsi operatoruna maliyyə xidmətlərinin göstərilməsi ilə bağlı icazə verillməsi ilə əlaqədar "Azərpoçt" depozitləri qəbul etmək imkanı əldə edəcək, eləcə də infrastrukturun hazırlığından asılı olaraq mikrokreditləşmə prosesinə cəlb olunacaq.
Azərbaycanın Rabitə və İnformasiya Texnologiyaları Nazirliyinin poçt rabitəsi şöbəsini müdiri Novruz Məmmədovun sözlərinə görə, poçt rabitə operatoru vasitəsi ilə əhali üçün ayrılacaq mikrokreditlərin həcmi beş min manatadək səviyyədə olacaq.
"Xidmətlərin bu növünə bu gün kreditləri yalnız banklar vasitəsilə alan əhalinin daha çox ehtiyacı var. Biz yerli banklardan biri ilə əhaliyə bu xidmətlərin göstərilməsi üçün müqavilə imzalamağı planlaşdırırıq", - Məmmədov bildirib.
Onun sözlərinə görə, ilkin mərhələdə "Azərpoçt" agent qismində çıxış edəcək, gələcəkdə isə əhaliyə kreditlərin verilməsi də nəzərdə tutulub.
Bu gün Azərbaycanda 45 bank fəaliyyət göstərir, onların filiallarının ümumi sayı 600-dən çoxdur. "Azərpoçt"un poçt şöbələrinin sayı 1600-dən çoxdur (onların təxminən 340-ı şəhərlərdə, rayon mərkəzlərində və qəsəbələrdə, yerdə qalanı isə kənd yerlərində əhaliyə xidmət göstərir).
İlkin mərhələdə poçt şöbələri məhdudlaşdırılmış bank əməliyyatları təqdim edəcəklər. Onlara kassa əməliyyatlarının aparılması, pul köçürmələri, müştəri hesablarının açılması və s. daxildir. Uzunmüddətli perspektivdə əhaliyə kreditlərin verilməsi də nəzərdə tutulur.
"Azərpoçt" MMC-nin fəaliyyətinin prudensial tənzimlənməsi və maliyyə xidmətlərinin göstərilməsi üzrə lisenziyanın verilməsi qaydalarına görə, poçt operatoru üçün minimal nizamnamə kapitalı 20 milyon manat məbləğındə (bu, ölkədə bankların kapitallaşmasına olan minimal tələbdən iki dəfə çoxdur), gündəlik ani likvidlik əmsalı 50 faiz nəzərdə tutulub. Açıq valyuta mövqeyinə minimal tələblər aşağıdakılardır - ayrı-ayrılıqda hər SKV üzrə beş, qapalı valyuta mövqeyi üzrə üç faiz, SKV üzrə ümumi aylıq mövqe 10 faiz və qapalı valyuta üzrə ümumi aylıq mövqe 7 faiz.
Milli poçt operatoru tərəfindən göstərilən maliyyə xidmətləri üzrə prudensial hesabatlılıq AMB-yə gələn ayın 10-dan gec olmayaraq təqdim olunmalıdır. İllik hesabatlar gələn il yanvarın 15-dən gec olmayaraq, müstəqil auditor hesabatı və təsdiqlənmiş illik balans, mənfəət və zərər üzrə hesabatlılıq mayın 1-dən gec olmayaraq təqdim olunmalıdır.
Azərbaycanın bank bazarına daxil olmaqla "Azərpoçt" bank bazarının oyunçuları ilə ciddi rəqabət aparacaq. Bu gün Azərbaycanın bank sektorunda 45 bank fəaliyyət göstərir. Onların filial şəbəkəsi 626 bankı birləşdirir. Halbuki "Azərpoçt"un poçt şöbələrinin sayı 1600-ü keçir (onlardan 340-ı şəhərlərdə, rayon mərkəzlərində və qəsəbələrdə, qalanları isə kənd yerlərində əhaliyə xidmət göstərir).
Dekabrın 1-nə rəsmi məzənnə 0,8003 AZN/USD təşkil edir.