Azərbaycan, Bakı, 2 dekabr /Trend, müxbir Ü.İsmayılova/
Azərbaycan Auditorlar Palatası (AAP) beynəlxalq audit standartlarını tətbiq etməyən auditorlara qarşı ciddi tədbirlər görmək niyyətindədir. Bu barədə cümə axşamı AAP sədrinin elmi-metodik
məsələlər üzrə müşaviri Nəcəf Talıbov bildirib.
"Auditorların beynəlxalq standartlara riayət etməmələrinə dair faktlar aşkara çıxarsa, onların lisenziyaları geri götürülə bilər. Cüzi pozuntular zamanı auditorlara münasibətdə nisbətən yüngül cəzalar tətbiq olunacaq", - Talıbov bildirib.
Onun sözlərinə görə, hazırda palatanın nümayəndələri tərəfindən bu sahədə beynəlxalq standartların tətbiqi üzrə ciddi yoxlamalar aparılır. Yoxlamalar AAP yanındakı xüsusi struktur tərəfindən aparılır ki, onun üzvləri müvafiq strukturların nümayəndələridirlər. Talıbovun sözlərinə görə, yoxlamaların aparılması üçün ayrıca strukturun yaradılması beynəlxalq audit standartlarının tələblərindən biridir.
"Yoxlamaların nəticələri gələn ilin əvvəlində açıqlanacaq. Onların yekunları üzrə göstərilən tələblərə uyğun gələn şirkətlərin və fiziki şəxslərin adları açıqlanacaq",, - Talıbov bildirib.
2010-cu il yanvarın 1-dən Azərbaycanda beynəlxalq audit standartlarının tətbiqinə başlanılıb.
Azərbaycan Auditorlar Palatası 1995-ci ilin sentyabrında təsis olunub və 1996-cı ilin aprelindən aktiv fəaliyyətə başlayıb. Azərbaycanda "Auditor fəaliyyəti haqqında" qanun 1994-cü ildə qəbul edilib. Bu gün Azərbaycanda 53 auditor şirkəti və 44 auditor xidməti göstərən fiziki şəxs fəaliyyət göstərir.
