Azərbaycan, Bakı, 7 dekabr /Trend, müxbir Ü.İsmayılova/
Azərbaycan Turizm Assosiasiyası (ATA) Azərbaycan İqtisadi İnkişaf Nazirliyinin nümayəndələri ilə birgə yaxın günlərdə ölkənin turizm şirkətlərində monitorinqlərin aparılmasına başlayacaq. Bu barədə çərşənbə axşamı ATA-nın rəhbəri Nahid Bağırov deyib.
"Monitorinqlər əsasən regionlarda qeyri-qanuni fəaliyyət göstərən, yəni lisenziya almadan fəaliyyət göstərən turizm şirkətlərinin aşkarlanması məqsədilə aparılacaq", - Bağıqov qeyd edib.
Onun sözlərinə görə, monitorinqin predmeti turizm şirkətləri tərəfindən göstərilən iş və xidmətlərin keyfiyyətinin yoxlanılması da olacaq.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb, 2010-cu ilin oktyabrında isə ölkənin Mehmanxanalar Assosiasiyası ilə birləşib. Assosiasiyaya 58 üzv daxildir.
Assosiasiyanın əsas fəaliyyət istiqamətləri: turizm şirkətlərinin maraqlarının qorunması, qanun layihələrinin işlənib hazırlanması, milli turizm şirkətinin yaradılmasına yardım, bazar iştirakçıları üçün təlim və seminarların keçirilməsi üzrə planın hazırlanması, Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması, daxili turizmin inkişafı və dünya bazarında turizm məhsullarının təqdim olunması.
Həmçinin fəaliyyət istiqamətlərinə konqres turizminin inkişafı və tətbiqi, idarəetmə və xidmət sahəsində peşəkar kadrların hazırlanmasına yardım, turizm sahəsində adekvat vergi qoyuluşunun yaradılması və normativ nizamlamalar, standartlaşdırma, sertifikatlaşdırma və lisenziyalaşdırmanın inkişafına yardım, beynəlxalq turizm şirkətləri ilə əməkdaşlıq, rəsmi nəşriyyat orqanının yaradılması, hüquqi məsləhətləşmələr sahəsində xidmətlər, normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq daxildir.
Hazırda Azərbaycanda 200-dən çox lisenziyalaşdırılmış turizm şirkəti fəaliyyət göstərir.
