Azərbaycan, Bakı, 8 dekabr /Trend, müxbir N.İsmayılova/
Noyabrda Azərbaycanın vergi orqanlarında Azərbaycan-Türkiyə şirkəti "Renaissance Construction Azerbaijan" dövlət qeydiyyatından keçib. Bu barədə çərşənbə günü Vergilər Nazirliyinin rəsmi saytının "bir pəncərə" bölməsində deyilir.
Onun təsisçiləri Türkiyənin "REC Uluslararası Insaat Yatırım Sanayi ve Ticaret A.S" və Azərbaycanın "Synergy Construction" şirkətləridir. Şirkət dövlət qeydiyyatından 2010-cu il noyabrın 10-da keçib. Şirkətin qanuni nümayəndəsi Kamran Məmmədovdur. Şirkətin Müşahidə Şurasının üzvləri Əkrəm Bayramov, Kamil Əliyev, Seymur İbrahimov və Ağasəməd Əfəndiyevdir. Şirkət bir min dollar məbləğində nizamnamə kapitalı ilə qeydiyyatdan keçib.
Bu gün "Renaissance Construction" analoji şirkətləri dünyanın yeddi ölkəsində yaradıb. Şirkət dünyada böyük ticarət mərkəzləri, aeroportlar, fabriklər, sement zavodları, ofislər, mehmanxanalar, dəniz vağzalları və su elektrik stansiyaları tikməklə, baş podratçı, bəzi hallarda isə səhmlərin sahibi kimi çıxış edir.
