Azərbaycan, Bakı, 28 dekabr /Trend, müxbir A.Axundov/
2010-cu ilin 11 ayı ərzində Türkiyədən Azərbaycana ixrac 10,9 faiz artaraq 1,4 milyard dollar təşkil edib. Bu barədə Türkiyə İxracatçılar Şurasından (TİM) Trend-ə elektron poçtla məlumat verilib.
"Hazırkı inkişaf tempini nəzərə alaraq, biz 2011-ci ilin sonlarında Türkiyədən Azərbaycana ixracı 1,7 milyard dollar səviyyəsində proqnozlaşdırırıq", - TİM-dən bildirilib.
2005-ci ildə Türkiyədən Azərbaycana ixrac 538 milyon dollar təşkil edib, 2010-cu ildə ixrac 160 faiz artaraq 1,4 milyard dollara çatıb. Bu dövr ərzində ən yüksək artım gül (3292 faiz), qiymətli metallar (2366 faiz), təzə meyvə-tərəvəz (486 faiz) və tütünün (420 faiz) ixracında qeydə alınıb.
"Belə yüksək artım templəri onunla bağlıdır ki, əvvəllər bu malların ixracı çox məhdud idi", - TİM-dən xəbər veriblər.
Türkiyə İxracatçılar Şurasından bildirilib ki, Azərbaycandan idxal Azərbaycana ixraca nisbətən daha yüksək templərlə artır.
"Azərbaycandan idxalda artım artmaqda davam edəcək və bir çox hallarda enerji sektorundakı idxal hesabına artacaq", - TİM-dən bildiriblər.
TİM-ə görə, Azərbaycan bazarı Türkiyə üçün ən prioritet bazardır.
"Biz Türkiyənin xarici ticarətinin qarşılıqlı və balanslaşdırılmış olmasına çalışırıq, həm Azərbaycan, həm də türk şirkətləri üçün sərfəli fəaliyyət göstəririk", - TİM-dən bildiriblər.
Türkiyə İxracatçılar Şurası özündə Türkiyə ixracının regionlar və sektorlar üzrə 61 ixracatçılar birliyini birləşdirir.
