Azərbaycan, Bakı, 28 dekabr /Trend, müxbir N.İsmayılova/
2011-ci ildə Azərbaycanda elektron ticarət üzrə ƏDV-nin (əlavə dəyər vergisi) tətbiqinə dair təklif hazırlana bilər. Bu barədə çərşənbə axşamı Vergilər Nazirliyinin Vergi Siyasəti və Strateji Araşdırmalar Baş İdarəsinin şöbə müdiri Vüsal Şıxəliyev bildirib.
"Vergilər Nazirliyi ölkə daxilində aparılacaq elektron ticarətə ƏDV-nin tətbiqi üçün təklif hazırlayacaq", - o deyib.
Şıxəliyevin sözlərinə görə, indi ölkədə onlayn mağazaların populyarlığı artır və belə olan halda vergi tutulmasına dair məsələnin həll edilməsi vacibdir. Təklifin hazırlanması Vergilər Nazirliyinin 2011-ci ildə nazirlik qarşısında duran öhdəliklərin yerinə yetirilməsi üzrə tədbirlər planı çərçivəsində həyata keçiriləcək.
Azərbaycanda ƏDV dərəcəsi 18 faiz təşkil edir.
