Azərbaycan, Bakı, 8 yanvar /Trend, müxbir A.Axundov/
Bakı-Tbilisi-Qars dəmiryolunun tikintisi başa çatdıqdan sonra Türkiyənin Avropa və cənub limanlarına Qafqaz və Mərkəzi Asiya ölkələrindən yük axınının həcmi xeyli artacaq. Eyni zamanda, Qars və Qapıqüllə şəhərlərini birləşdirən və Türkiyənin öz-özlüyündə nəqliyyat arteriyası olan Şərq-Qərb nəqliyyat dəhlizinin Naxçıvan və İranla birləşməsi xüsusi əhəmiyyət kəsb edəcək. Bu barədə Trend-ə müsahibəsində Türkiyənin nəqliyyat naziri Binali Yıldırım deyib.
Onun sözlərinə görə, 1994-cü ildə Türkiyə Nəqliyyat Nazirliyi tərəfindən hazırlanan Qars-İqdır-Aralıq-Dilucu dəmiryol nəqliyyatının texniki-iqtisadi əsaslandırmasına əsasən, dəmiryolunun bu qol Naxçıvan və İranın nəqliyyat şəbəkələri ilə birləşəcək.
Türkiyənin Dilucu şəhəri Naxçıvan Muxtar Respublikası və İranla həmsərhəddir.
"İkitəkərli olacaq xəttin uzunluğu 223,6 kilometr olaraq elektrikləşdiriləcək və siqnalizasiya sitemi ilə təmin ediləcək", - Yıldırım qeyd edib.
Türkiyə nazirinin sözlərinə görə, Qars-İqdır-Aralıq-Dilucu dəmiryol qolunun layihəsi üzərində iş 2010-cu il martın 22-də başlayıb, yerin xəritəçəkmə və ölçmə işləri 2010-cu ilin dekabrında başa çatıb. Ətraf mühitə təsir və layihənin icra edilməsi üzrə işlər 2011-ci ilin fevralında yerinə yetiriləcək. Bundan başqa, tunel və körpü qurğularının layihələrinin işlənməsi üzrə də işlər davam etdirilir.
Bundan əvvəl Azərbaycanın nəqliyyat naziri Ziya Məmmədovun dediyinə görə, Azərbaycan, Gürcüstan və Türkiyənin dəmiryol sistemini birləşdirəcək Bakı-Tbilisi-Qars dəmiryolunun tikintisi çərçivəsində işlərin 2012-ci ilin birinci yarısında başa çatdırılması planlaşdırılıb.
Bakı-Tbilisi-Qars layihəsi çərçivəsində dəmiryol magistralının yeni 105 km-lik qolunun tikintisi də planlaşdırılır. Bunun 76 km-i Türkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda Axalkalaki-Marabda-Tbilisi dəmiryol məntəqəsi yenidən qurulacaq.
Dəhlizin yüksək buraxılış qabiliyyəti 17 milyon ton yük təşkil edəcək. İlkin mərhələdə bu göstərici 1 milyon sərnişin və 6,5 milyon ton yük təşkil edəcək.
