Azərbaycan, Bakı, 14 yanvar /Trend, müxbir N.İsmayılova/
Asiya İnkişaf Bankı (AİB) 2011-ci il mayın 3-6-da Vyetnamın paytaxtı Hanoyda 44-cü illik iclasını keçirəcək. Bu barədə cümə günü AİB məlumat yayıb.
Tədbirdə təxminən üç min nəfər, o cümlədən hökumət nümayəndələri, mərkəzi bank rəhbərləri və maliyyə nazirləri, eləcə də özəl sektorun nümayəndələri, elm xadimləri, KİV və vətəndaş cəmiyyətinin nümayəndələri iştirak edəcəklər.
Növbəti iclas Vyetnama investisiyalar, regional inteqrasiya, infrastrukturun inkişafı, əhalinin nisbətən daha yoxsul təbəqələrinin müdafiəsi və özəl sektorun inkişafı mövzularına həsr olunacaq. İclasın əsas mövzusu - "Asiyanın özünü kökündən dəyişdirmək və 2050-ci ilədək şəxsi uğurlarının saxlanması üçün konkret nə etməli olduğu" müzakirə olunacaq. İclasda İndoneziya, Monqolustan, Papua-Yeni Qvineya, Banqladeş və Timor-Leşti ölkələrinin təqdimatı keçiriləcək.
Bankda Azərbaycandan işlər müdiri iqtisadi inkişaf naziri Şahin Mustafayev, alternativ işlər müdiri isə maliyyə naziri Samir Şərifovdur.
Azərbaycan 1999-cu ildən Asiya İnkişaf Bankının üzvüdür. 2010-cu ilin əvvəlinə ölkə üzrə bankın kredit portfeli 14 layihə üzrə 660,4 milyon dollar təşkil edib. Əməkdaşlıq dövründə AİB Azərbaycan hökuməti və yerli şirkətlərə ümumi məbləği 13,122 milyon dollar həcmində qrantlar ayırıb.
AİB 1966-cı ildə təsis edilib və 67 üzvü var. Onun mənzil-qərargahı Filippinin paytaxtı Manilada yerləşir. Azərbaycanın bankın kapitalında iştirak payı 0,5 faizdir.
AİB-in aparıcı səhmdarları Yaponiya və ABŞ (ümumi səhmdar kapitalın 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və başqalarıdır.