...

Azərbaycan poçt operatoru yalnız agent kimi mikrokreditləşdirməyə cəlb edilə bilər

Biznes və iqtisadiyyat xəbərləri Materials 16 Fevral 2011 13:15 (UTC +04:00)

Trend-i buradan izləyin

Azərbaycan, Bakı, 16 fevral /Trend, müxbir H.Vəliyev/

Azərbaycan dövlət poçt rabitəsi operatoru "Azərpoçt" hər hansı iri bankın vasitəçiliyi ilə mikrokreditləşdirməyə cəlb edilə bilər. Bu barədə çərşənbə günü Rabitə və İnformasiya Texnologiyaları Nazirliyinin Poçt rabitəsi şöbəsinin müdiri Novruz Məmmədov bildirib.

"Poçt operatoru tərəfindən müstəqil şəkildə mikrokreditlərin verilməsi gündəlikdə yoxdur, çünki bu proses yüksək riskli əməliyyatlardır. Yaxın perspektivdə bu məsələyə baxılmayacaq və o beş ildən sonra gündəliyə daxil edilə bilər", - Məmmədov deyib.

Onun sözlərinə görə, "Azərpoçt" hansısa iri bankın vasitəçiliyi ilə mikrokreditlərin verilməsinə başlaya bilər, lakin cari ildə bu, çətin ki, mümkün olsun.

"Burada söhbət iri kreditlərin deyil, yalnız mikrokreditlərin verilməsindən gedir", - Məmmədov bildirib.

Azərbaycan Mərkəzi Bankı da (AMB) poçt operatoruna ilkin mərhələdə ölkənin bank bazarının liderlərindən biri ilə müqavilə bağlamağı tövsiyə edir. Bu, onunla bağlıdır ki, Azərbaycanın poçt rabitə operatoru "Azərpoçt"un likvidliyi və aktivləri ölkədə fəaliyyət göstərən bankların səviyyəsi ilə uyğun deyil. Bu da maliyyə xidmətlərinin göstərilməsində operatorun başlıca problemidir.

Bir müddət əvvəl Məmmədovun dediyi kimi, poçt rabitəsi operatoru vasitəsi ilə əhali üçün ayrılacaq mikrokreditlərin həcmi beş min manatadək olacaq.

Onun sözlərinə görə, ilkin mərhələdə "Azərpoçt" agent qismində çıxış edəcək, gələcəkdə isə əhaliyə birbaşa kreditlərin verilməsi də nəzərdə tutulub.

Bu gün Azərbaycanda 44 bank fəaliyyət göstərir, onların filiallarının ümumi sayı 644-dən çoxdur. "Azərpoçt"un poçt şöbələrinin sayı 1600-dən çoxdur (onların təxminən 340-ı şəhərlərdə, rayon mərkəzlərində və qəsəbələrdə, yerdə qalanı isə kənd yerlərində əhaliyə xidmət göstərir).

"Azərpoçt" ötən ilin sonlarında maliyyə xidmətlərinin göstərilməsi üçün AMB-dən icazə alıb.

"Azərpoçt" MMC-nin fəaliyyətinin prudensial tənzimlənməsi və maliyyə xidmətlərinin göstərilməsi üzrə lisenziyanın verilməsi qaydalarına görə, poçt operatoru üçün minimal nizamnamə kapitalı 20 milyon manat məbləğində (bu, ölkədə bankların kapitallaşmasına olan minimal tələbdən iki dəfə çoxdur), gündəlik ani likvidlik əmsalı 50 faiz nəzərdə tutulub. Açıq valyuta mövqeyinə minimal tələblər aşağıdakılardır - ayrı-ayrılıqda hər SKV üzrə beş, qapalı valyuta mövqeyi üzrə üç faiz, SKV üzrə ümumi aylıq mövqe 10 faiz və qapalı valyuta üzrə ümumi aylıq mövqe 7 faiz.

Milli poçt operatoru tərəfindən göstərilən maliyyə xidmətləri üzrə prudensial hesabatlılıq AMB-yə gələn ayın 10-dan gec olmayaraq təqdim olunmalıdır. İllik hesabatlar gələn il yanvarın 15-dən gec olmayaraq, müstəqil auditor hesabatı və təsdiqlənmiş illik balans, mənfəət və zərər üzrə hesabatlılıq mayın 1-dən gec olmayaraq təqdim olunmalıdır.

Fevralın 16-na rəsmi məzənnə 0,7954 AZN/USD təşkil edir.

Xəbər lenti

Xəbər lenti