Azərbaycan, Bakı, 22 fevral /Trend, müxbir Ü.İsmayılova/
2011-ci ilin əvvəli daşınmaz əmlak bazarında 2010-cu ilin əvvəlinə olan vəziyyətdən fərqli olaraq, tələbatın artması ilə əlamətdar olub. Bu barədə Əmlak Məsələləri Dövlət Komitəsinin "Daşınmza əmlak" jurnalına müsahibəsində Rieltorlar Assosiasiyasının rəhbəri Elnur Azadov deyib.
"Tələbatın artmasına əsas səbəb böhranın tədricən zəifləməsi, dünya bazarında neft qiymətlərinin artması, Azərbaycanın iqtisadi inkişafı, eləcə də qeyri-neft sektorunun və biznesin inkişafı olub", - Azadov qeyd edib.
Onun sözlərinə görə, ilin birinci yarısında ölkənin daşınmaz əmlak bazarında ciddi dəyişikliklər gözlənilmir. Bununla yanaşı, ipoteka kreditləşməsi proqramının inkişafı ilə əlaqədar nisbətən ucuz olan mənzilə tələbatın artması qaçılmazdır. Bu, ilk növbədə belə mənzillərin qiymətlərinə müəyyən təsir göstərəcək. Hazırda mənzil bazarında yeni tikililərdə birotaqlı və ikiotaqlı mənzillərə tələbatın artması müşahidə edilir. Bu, ilin sonunadək digər mənzillərin də qiymətinə təsir göstərəcək mənzilin bu növünün qiymətinin artacağını proqnozlaşdırmağa imkan verir.
Tələbatın artmasına mənzil fondunun həcminin az olması da təsir göstərir, Azadov bildirib.
Belə artım əhalinin təbii artımı, urbanizasiya prosesi, xarici vətəndaşların axını, xaricdə yaşayan soydaşlarımızın mənzil alması və digər proseslər nəticəsində baş verir. Son iki ildə Bakıda yeni tikililərin ucaldılmasına verilən icazələr kəskin azalıb, bu isə bu növ mənzillərin qiymət artımına səbəb olacaq.
Assosiasiyanın icraçı direktorunun sözlərinə görə, hazırda Bakıdakı tikililərin 25-30 faizini əsasən Nizami, Xətai rayonlarında, eləcə də mikrorayonlarda yerləşən 1970-1990-cı illərin tikililəri təşkil edir.
Azadovun fikrincə, sağlam rəqabətin təmini, mənzil fondunun artırılması və qiymət balansının formalaşdırılması məqsədilə tikintinin miqyasının artırılması vacibdir.
