Аzərbaycan, Bakı, 3 mart /Trend, müxbir N.İsmayılova/
Azərbaycan Mərkəzi Bankı (AMB) yanvar ayında (dövriyyədəki nağd pulların (banklardan kənarda) və maliyyə təşkilatlarının (kredit təşkilatlarından başqa) və fiziki şəxslərin hesablarındakı milli valyuta vəsaitləri qalıqlarının) pul kütləsinin (M2) 6,4 faiz, 2010-cu ilin analoji dövrü ilə müqayisədə isə 33 faiz artdığını bəyan edib. Bu barədə cümə axşamı AMB-nin məlumatında bildirilir.
Belə ki, 2011-ci il fevralın 1-nə olan vəziyyətə görə, M2 göstəricisi 7763,8 milyon manat təşkil edib. Dekabrın əvvəlində bu rəqəm 5964 milyon manat, 2010-cu il fevralın 1-də isə 5837,7 milyon manat olub.
2011-ci il fevralın 1-nə olan vəziyyətə görə, nağd pul kütləsi (M0) 5266,8 milyon manat təşkil edib. Yanvarın əvvəlində bu rəqəm 5455,8 milyon manat, 2010-cu il fevralın 1-də isə 3972,8 milyon manat təşkil edib.
Genişlənmiş pul kütləsi (Broad Money Supply (M3) fevralın yekunları üzrə 10107,3 milyon manat, yanvarın əvvəlində 10527,5 milyon manat, 2010-cu il fevralın 1-də isə 8143,8 milyon manat təşkil edib.
Fevralın nəticələrinə əsasən, sövdələşmələr üçün məbləğlər (transaction money (M1) 6542,3 milyon manat, yanvarın əvvəlində 6718,9 milyon manat, 2010-cu il fevralın 1-də isə 4857,2 milyon manat təşkil edib.
Martın 3-nə olan rəsmi məzənnə 0,7940 AZN/USD təşkil edir.