Azərbaycan, Bakı, 17 mart /Trend, müxbir Ü.İsmayılova/
Azərbaycanda sığorta bazarı ölkə əhalisi arasında sığorta mədəniyyətinin səviyyəsinin artırılması, həyat sığortası ilə bağlı investisiya alətlərinin çeşidinin artırılması və güclü marketinq sistemi hesabına inkişaf edə bilər. "Atəşgah Həyat" sığorta şirkətinin qarışıq sığorta departamentinin rəhbəri Şəfəq Həsənova bu fikirdədir.
Onun sözlərinə görə, Azərbaycanda həyat sığortasının inkişafını təmin etmək üçün inkişaf etmiş ölkələrin təcrübəsini tətbiq etmək, əhali arasında genişmiqyaslı maarifləndirmə işi aparmaq, əhali üçün yeni maraqlı məhsullar yaratmaq, qanunvericilik bazasını, marketinq sistemini təkmilləşdirmək, həyat sığortasının icbari növlər seqmentini inkişaf etdirmək lazımdır.
Həsənovanın sözlərinə görə, həyat sığortasının ölkə iqtisadiyyatında rolunun əhəmiyyəti az deyil.
"Sığortanın bu növü makroiqtisadi sabitliyi təmin edir, əhalinin maliyyə institutlarına inamını artırır. Həyat sığortasının yığımı inflyasiya əleyhinə vasitə ola bilər, uzunmüddətli investisiyaları təmin edə bilər", - şirkətin departament rəhbəri vurğulayıb.