Azərbaycan, Bakı, 30 mart /Trend, müxbir N.İsmayılova/
Azərbaycan Sahibkarlar (İşəgötürənlər) Milli Konfederasiyası (ASK) və Hindistan Ticarət-Sənaye Palatası Federasiyası (FICCI) əməkdaşlığın genişləndirilməsini hədəfləyiblər. Bu barədə çərşənbə günü ASK prezidenti Məmməd Musayev deyib.
"Təşkilatlar arasında imzalanan əməkdaşlıq haqqında memorandum çərçivəsində biz daha sıx əməkdaşlıq etmək və hər iki ölkənin marağını təmsil etmək niyyətindəyik. Hindistan Azərbaycanın regionların sosial-iqtisadi inkişafı, ərzaq təhlükəsizliyinin təmini üzrə dövlət proqramlarının həyata keçirilməsində istifadə edə biləcəyi böyük təcrübəyə malikdir", - o qeyd edib.
Çərşənbə günü ASK və FICCI Bakıda əməkdaşlıq haqqında memorandum imzalayıblar.
Musayevin sözlərinə görə, İT də Hindistan üçün aparıcı sektordur və Azərbaycan bu sahədəki xidmətlərdən bank və digər sektorlarda istifadə edə bilər, çünki ölkədə onlara tələbat və ehtiyac var.
"Hazırda Azərbaycanda əsasən İT və ərzaq sahəsində cəmisi bir neçə Hindistan şirkəti fəaliyyət göstərir. Bizim məqsədimiz qeyri-neft sektorunda əməkdaşlığı inkişaf etdirməkdir. İmkanlar xüsusilə, kənd təsərrüfatı, İT, bank sektorlarında var", - FICCI-nin baş katibinin köməkçisi Şeyla Sudhakaran deyib.
Onun szölərinə görə, FICCI Cənubi Qafqaz ölkələri ilə regional əməkdaşlıq məsələsini də müzakirə edəcək, çünki palata təkcə ölkələr səviyyəsində deyil, həm də regional səviyyədə münasibətlərin inkişafına hədəflənib.
