Azərbaycan, Bakı, 30 mart /Trend, müxbir N.İsmayılova/
Azərbaycan Mərkəzi Bankının (AMB) açıqladığı ödəniş balansına əsasən, 2010-cu il ərzində ölkənin ödəniş balansının cari əməliyyatlarının say profisiti 15 milyard dollar təşkil edib. O cümlədən dollar qeyri-neft sektorundakı cari əməliyyatlarının say profisitini 4,8 milyard dollarla tam ödəyən neft-qaz sektorunun cari əməliyyatlarının say profisiti 19,9 milyard təşkil edib.
Sektorlar üzrə ödəniş balansının təhlili göstərdi ki, əvvəliki illərdə olduğu kimi, 2010-cu ildə də neft-qaz sektorundakı xarici iqtisadi əməliyyatlar müsbət, qeyri-neft sektorundakı əməliyyatlar isə mənfi saldoya malik olub.
Ötən il ərzində xarici mal dövriyyəsinin ümumi həcmi 33,2 milyard dollar təşkil edib, müsbət saldo isə 19,7 milyard dollara çatıb. Bununla yanaşı, mal idxalı 6,7 milyard dollar, ixrac əməliyyatları isə 26,5 milyard dollar məbləğində həyata keçirilib.
Hesabat dövrü ərzində 150 ölkə ilə ticarət münasibəti olub. Bununla yanaşı, mal dövriyyəsinin 12 faizi MDB, 88 faizi digər xarici ölkələrin payına düşür. İntensiv ticarət münasibətləri İtaliya, ABŞ, İsrail, Rusiya, Fransa, Türkiyə, Böyük Britaniya, Ukrayna, Gürcüstan və Çinlə aparılıb. Azərbaycanın ixrac-idxal əməliyyatlarının 68 faizi onların payına düşür.