Azərbaycan, Bakı, 4 aprel /Trend, müxbir N.İsmayılova/
Dünya Bankının (DB) Azərbaycanda kapital bazarının inkişafı üzrə layihəsinin reallaşdırılmasına yayda başlanacaq. Bu barədə bazar ertəsi DB-in Azərbaycan üzrə meneceri Cozef Ouen (Joseph Owen) bildirib.
"Bu layihə üçün maliyyə vəsaitləri artıq iyun-iyul aylarında daxil olmağa başlayacaq. Bu layihə həyata keçirilməsinə hazırlıq məqsədilə rəsmi prosedurlardan keçir", - Ouen bildirib.
Bir müddət əvvəl bankın məlumatında deyildiyi kimi, Dünya Bankının (DB) Direktorlar Şurası maliyyələrə girişin və qeyri-neft sektorunun sürətli iqtisadi artımına yardımın yaxşılaşdırılması məqsədilə kapital bazarı alətlərinin genişləndirilməsində Azərbaycana yardım üzrə maliyyə paketini təsdiqləyib.
DB-nin kapital bazarının modernləşdirilməsi (CMMP) üçün nəzərdə tutulan 12 milyon dollar məbləğində krediti maliyyə sektorunun möhkəmləndirilməsi və şaxələndirilməsində Azərbaycan hökumətinə göstərdiyi dəstəyin davamıdır.
Beləliklə də layihə ortamüddətli perspektivdə özəl sektora davamlı alternativ maliyyə mənbələri üçün imkanların təmin edilməsi yolu ilə dəstəyin artırılmasını nəzərdə tutur ki, bu da Dünya Bankının 2011-2014-cü illərdə ölkə ilə qeyri-neft sektorunun gücləndirilməsi strategiyası çərçivəsində birinci strateji tapşırığın icrasına kömək edəcək.
CMMP layihəsi maliyyə sektorunun daha yaxşı şaxələndirilməsi, ortamüddətli perspektivdə korporativ idarəetmənin möhkəmləndirilməsi və maliyyəyə girişin yaxşılaşdırılması yolu ilə qeyri-neft sektorunun inkişafının sürətləndirilməsi üçün zəruri olan prioritet və razılaşdırılmış islahatlar paketini dəstəkləyir.
CMMP layihəsi Beynəlxalq Yenidənqurma və İnkişaf Bankının (DB qrupuna daxildir) vəsaitləri hesabına üç illik güzəşt dövrü ilə 15 il müddətinə verilir.
Azərbaycanla əməkdaşlığın əvvəlindən DB tərəfindən ölkəyə 43 layihə üçün 2,9 milyard dollar vəsait ayrılıb.
