Azərbaycan, Bakı, 14 aprel /Trend, müxbir N.İsmayılova/
2011-ci ildə Azərbaycanda vergi daxilolmaları üzrə büdcə proqnozlarının yerinə yetirilməsində problem gözlənilmir. Trend-in məlumatına görə, bu barədə cümə axşamı mətbuat konfransında vergilər naziri Fazil Məmmədov deyib.
"Ötən ilin anoloji dövrü ilə müqayisədə ölkədə qeyri-neft sektorunun inkişafı və regionların iqtisadi inkişafı fonunda iqtisadi artım templəri artırılır. Dövlət büdcəsinə vergi daxilolmaları üzrə bütün proqnozlar yerinə yetirilir və bununla bağlı problem gözlənilmir", - Məmmədov qeyd edib.
Maliyyə naziri Samir Şərifovun Prezident İlham Əliyevin sədrliyi ilə keçirilən Nazirlər Kabinetinin 2011-ci ilin birinci rübünün sosial-iqtisadi inkişafının yekunlarına həsr olunmuş geniş iclasında dediyinə görə, cari ilin birinci rübündə dövlət büdcəsinin mədaxili 2 milyard 768 milyon manat, xərcləri 2,087 milyard manat olub.
Ölkənin dövlət büdcəsinin profisiti 681 milyon manat təşkil edib.
"Cari ilin birinci rübündə dövlət büdcəsinə mədaxil üzrə proqnozlar 118 faiz, xərclər üzrə proqnozlar siə 87,3 faiz yerinə yetirilib. Ötən ilin analoji dövrü ilə müqayisədə büdcə gəlirləri 13,2 faiz, xərcləri 5,5 faiz (108 milyon manat) artıb", - Şərifov əlavə edib.
Vergilər Nazirliyi büdcəyə 1 milyard 161 milyon manat, ötən ilin eyni dövrünə nisbətən 151,0 milyon manat və ya 15,0 faiz çox vəsaitin daxil olmasını təmin edib. Bu vəsaitin 58,7 faizi və ya 681,0 milyon manatı qeyri-neft sektorundan daxilolmaların payına düşür ki, bu da 2010-cu ilin müvafiq dövrünə nisbətən 132,0 milyon manat və yaxud 24,0 faiz çoxdur.
Aprelin 14-nə olan rəsmi məzənnə 0,7918 AZN/USD təşkil edir.