Azərbaycan, Bakı, 16 aprel /Trend, müxbir İ.Xəlilova/
Bakıda aprelin 21-22-də İqtisadi Əməkdaşlıq Təşkilatına (İƏT) üzv ölkələrin iqtisadi tədqiqatlar və statistika üzrə milli əlaqələndiricilərinin VIII iclası keçiriləcək. Bu barədə şənbə günü Dövlət Statistika Komitəsindən məlumat verilib.
Bu, təşkilatın Bakıda keçirilən ikinci tədbiridir. Birinci iclas 2002-ci ildə baş tutub.
Hazırkı görüşlər zamanı üzv ölkələr arasında iqtisadi tədqiqatlar, statistika və məlumatların ötürülməsinin daxili regional sistemləri sahəsində əməkdaşlığın genişləndirilməsinin əsas cari vəzifələri müzakirə olunacaq.
Təşkilata üzv ölkələrin statistik məlumatlarının yerləşdirilməsi üçün ECOstat veb-səhifəsi yaradılıb. Bununla yanaşı, İƏT milli əlaəqləndiriciləri ilə katibliyi arasında informasiyanın lazımi mübadiləsi və yenilənməsi üçün məlumatların ötürülməsi sistemində daim fəaliyyət göstərən kanalların yaradılması məsələsi aktuallığını saxlayır.
İƏT 1985-ci ildə yaradılıb. 1993-cü ildə təşkilat BMT-də, bir il sonra isə İslam Konfransı Təşkilatında müşahidəçi statusunu əldə edib.
