Azərbaycan, Bakı, 20 aprel /Trend, müxbir A.Axundov/
Bu ilin birinci rübündə Azərbaycanın sığorta şirkəti "Alfa Sığorta"nın sığorta mükafatlarının 45 faizi bədbəxt hadisələrdən və xəstəliklərdən sığortanın payına düşür. Bu barədə çərşənbə günü şirkətin məlumatında deyilir. Şirkət sığortanın bu növü üzrə 181,614 min manat həcmində mükafat yığıb.
Hesabat dövründə şirkət 403,812 min manat məbləğində sığorta mükafatı yığıb ki, bu da ötən ilin analoji dövründəki göstəricini 44,2 faiz ötür. 111,881 min manat (yığımların ümumi həcminin 28 faizi) avtonəqliyyat vasitələrinin sığortasına və 42,651 min manat (11 faiz) əmlakın yanğından sığortası və digər risklərin payına düşüb.
2011-ci ilin ilk üç ayı ərzində sığortanın könüllü növləri üzrə şirkətə daxilolmalar 359,97 min manat, icbari sığorta üzrə 43,842 min manat təşkil edib.
Yanvar-martda şirkətin ödənişləri 85,319 min manat təşkil edib ki, bu da 2010-cu ilin birinci rübündəkindən 53 faiz azdır.
Ödənişlərin 66 faizi, yaxud 56,41 min manat avtonəqliyyat vasitələrinin sığortası, 13,4 faiz, yaxud 11,393 min manat bədbəxt hadisələrdən və xəstəliklərdən sığorta, 8,5 faiz, yaxud 7,255 min manat avtonəqliyyat vasitələri sahiblərinin vətəndaş məsuliyyəti icbari sığortasının payına düşüb.
"Alfa Sığorta"nın təsisçisi 2006-cı ilin dekabrında şirkətin səhmlərinin 100 faizini alan yerli "Texnikabank" ASC-dir. "Alfa Sığorta" altısı icbari, 24-ü könüllü olmaqla sığortanın 30 növü üzrə xidmət göstərilməsi barədə lisenziyaya malikdir.
Aprelin 20-nə olan rəsmi məzənnə 0,7918 AZN/USD təşkil edir.
