Azərbaycan, Bakı, 11 may /Trend, müxbir A.Axundov/
2011-ci il mayın 11-nə olan məlumata görə, Azərbaycanın ən iri lizinq şirkətlərindən olan "AG Leasing" şirkətinin portfeli 2010-cu il mayın 1-nə olan 5,499 milyon manata qarşı 3,258 milyon manat təşkil edib. Bu barədə Trend-ə çərşənbə günü şirkətdən məlumat verilib.
Beləliklə, il ərzində şirkətin porfeli 40,74 faiz, ay ərzində 1,15 faiz (aprelin 1-nə bu göstərici 3,296 milyon manat təşkil edib) azalıb.
Mayın əvvəlinə qüvvədə olan lizinq müqavilələrinin ümumi sayı 107 olub ki, o, aprelin birində 62-yə, ötən il 141-ə bərabər olub.
Lizinqə verilən avadanlıqların ümumi məbləği 2010-cu il mayın 1-dəki 8,554 milyon manat qarşı 5,551 milyon manat təşkil edib.
"AG Leasing" QSC lizinq portfelinin həcminə görə Azərbaycanın aparıcı lizinq şirkətləri qrupuna daxildir. Şirkətin müştəriləri həm hüquqi , həm də fiziki şəxslər- sahibkarlardır.
"AG Leasing" 2005-ci ildə yaradılıb. Şirkətin nizamnamə kapitalı bir milyon manat təşkil edir. Şirkət əsasən üç sahə üzrə lizinq verir - nəqliyyat, ticarət, tibbi ləvazimatlar. Şirkət lizinqə verilən avadanlıqları 60 ay müddətinə, əvvəlcədən 20 faizdən başlayaraq 50 faizə qədər ilkin ödənişlə və faiz dərəcəsi 20 faizdən 24 faizə olmaqla verir.
Şirkətin kapitalında "AG Bank"ın 35 faiz, "Hiperion Capital Management" - 30 faiz, "Delta Trans LLC" - 25 faiz və "Milio Leasing Limited"in 10 faiz pay hissəsi var.
Mayın 11 -nə rəsmi məzənnə 0,7911 AZN/USD təşkil edir .
