Azərbaycan, Bakı, 12 may /Trend, müxbir A.Axundov/
2011-ci ilin fəaliyyət yekunları üzrə Azərbaycanın sığorta bazarı 2010-cu ilə nisbətən 35 faiz artacaq. Bu barədə "Qarant Sığorta" şirkətinin idarə heyətinin sədri Vaqif Həsənov cümə axşamı Trend-ə müsahibəsində bildirib.
"Həyat sığortasına aid olmayan bazar birmənalı olaraq 20 faiz artmalıdır, amma əgər həyat sığortasını da nəzərə alsaq, ümumi bazаrın artımı təxminən 35 faiz təşkil edəcək", - Həsənov bildirib.
Azərbaycanın Maliyyə Nazirliyi yanında Dövlət Sığota Nəzarəti Xidmətinin məlumatına görə, 2010-cu ildə sığorta mükafatlarının ümumi həcmi 155,59 milyon manat təşkil edib.
Həsənovun sözlərinə görə, bazarın artımının stimullaşdırıcı amillərindən biri avtonəqliyyat vasitələri sahiblərinin məsuliyyətinin icbari sığortası (OSAQO) üzrə tarif siyasətindəki mümkün dəyişikliklər ola bilər.
"Təkcə bizim şirkətdə ötən illə müqayisədə OSAQO üzrə yığım və ödənişlər 50 faiz artıb. Əgər ötən il OSAQO üzrə nizamlanmış müraciətlərin sayı 51 ədəd təşkil edirdisə, ödənişlər təxminən 84 min manat səviyyəsində həyata keçirilib, onda ilk dörd ay ərzində bizə 39 müraciət daxil olub, 41 min manat həcmində ödəniş həyata keçirilib. İlin sonuna kimi OSAQO üzrə 120 min manat ödəcəyimiz gözlənilir", - Həsənov deyib.
Üçüncü oxunuşda ölkə parlamentinin müzakirəsində olan "Sığortanın icbari növləri haqqında" yeni qanun layihəsi icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyətinin, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.
Qanun layihəsi avtonəqliyyat vasitəsindən asılı olaraq sığorta tarifinin müəyyənləşdirilməsi zamanı şaxələndirilmiş yanaşmanı nəzərdə tutur. Əmlak üzrə OSAQO-nun ödəniş məbləği 5 min manat (hazırda 1 min manat), sağlamlıq üzrə 50 min manat (hazırda 5 min manat) təşkil edəcək. Fəaliyyətin bu növü 1996-cı ilin qanunu ilə tənzimlənir.
Avtonəqliyyat vasitələri sahiblərinin məsuliyyətinin icbari sığortasının inkişafı məqsədilə qanun layihəsində sığorta bürosunun yaradılması da nəzərdə tutulur. Bu büro respublikadakı bütün avtonəqliyyat vasitələrinin mərkəzi bazası funksiyasını yerinə yetirəcək.
OSAQO üzrə xidmətlərin göstərilməsinə dair lisenziyaya malik olan sığorta şirkətləri büronun üzvləri olacaqlar.
Büro iştirakçısı olan sığorta şirkətləri Avtonəqliyyat vasitələri sahiblərinin məsuliyyətinin icbari sığortası üzrə müqavilə çərçivəsində daxil olan mükafatların üç faizi həcmində təqvim ödənişləri ödəməlidirlər. Təqvim ödənişləri hesabat dövrünün başa çatmasından sonra 15 gün ərzində hər rüb büronun hesabına köçürülməlidir.
Büro sığorta hadisələri zamanı kompensasiyaların ödənilməsi üçün rezervləşdirmə mənbələri sırasında depozit təminatı da ödəməlidir. Büro üzvü olmaq istəyən sığorta şirkətləri birdəfəlik ödəniş - məbləği DSNX tərəfindən müəyyən olunan depozit təminatı ödəməlidir.
Belə büronun mövcud olması beynəlxalq Green Card vətəndaş məsuliyyəti sığorta polislərinin qarşılıqlı tanınma sisteminə daxil olmaq prosesi çərçivəsində də vacibdir.
Azərbaycanda 28 sığorta və bir təkrarsığorta şirkəti fəalityyət göstərir.
Mayın 12-nə rəsmi məzənnə 0,7908 AZN/USD təşkil edir.
