Azərbaycan, Bakı, 25 may /Trend, müxbir N.İsmayılova/
Azərbaycanda müasir ünvan reyestrinin yaradılması üçün ölkənin müvafiq qanunvericiliyini Avropa standartlarına uyğunlaşdırmaq lazımdır. Bu barədə çərşənbə günü Trend-ə ölkə hökumətindən deyiblər.
"Bu istiqamətdə artıq müvafiq addımlar atılıb. Azərbaycan Prezidenti İlham Əliyev "Ünvanlı reyestrin aparılması və daşınmaz əmlak obyektlərinə ünvanların verilməsi qaydaları"nı təsdiq edib. Lakin bu qaydalara bəzi dəyişikliklər etmək lazımdır", - mənbə bildirib.
Onun sözlərinə görə, ünvan dəqiq coğrafi koordinatlara malik olmalıdır. Bundan başqa, hər bir giriş və giriş yolunun koordinatları müəyyənləşdirilməlidir.
"Küçələrin adı və ünvanların tez-tez dəyişməsi səbəbindən küçə, prospekt və nəqliyyat infrastrukturunun digər obyektlərinə kodlar veriləcək ki, hər dəfə informasiya bazasında sənədi dəyişməyə ehtiyac olmasın", - hökumətdən bildiriblər.
Bu, küçələrin adından asılı olmayaq onun identifikasiyasını aparmağa imkan verəcək. MDB ölkələrində belə təcrübə hələ ki tətbiq edilmir. Dəyişikliklərin hamısı INSPIRE təlimatının tələblərinə uyğun olacaq.
INSPIRE (Infrastructure for Spatial Information in Europe) təlimatı 2002-ci ildə Avropa İttifaqının təşəbbüsü ilə məkan məlumatları infrastrukturunun unifikasiyası və coğrafi məkan məlumatlarından geniş istifadənin təmini məqsədilə yaradılıb.
Bundan əvvəl reyestrin yaradılması məqsədilə Azərbaycan və Norveç hökumətləri qrant sazişi imzalayıblar.
