...

Azərbaycanın iri bankı ölkədə islam bankçılığı üzrə müvafiq qanunvericiliyin qəbul edilməsi təşəbbüsü ilə çıxış edəcək

Biznes və iqtisadiyyat xəbərləri Materials 3 İyun 2011 16:41 (UTC +04:00)

Azərbaycan, Bakı, 3 iyun /Trend, müxbir N.İsmayılova/

Gələn həftə Azərbaycan Beynəlxalq Bankında (ABB) islam bankçılığı çərçivəsində xidmətlərin göstərilməsi üçün xüsusiləşdirilmiş qurumun yaradılması ilə bağlı tender təkliflərinin açılışı olacaq. Bu barədə Trend-ə ABB-nin idarə heyətinin sədri Cahangir Hacıyev deyib.

"Təkliflərə bankda yaradılan tender komissiyası baxacaq", - Hacıyev bildirib.

Onun sözlərinə görə, hər şeydən əvvəl qurum Azərbaycanda islam bankçılığının tətbiqi üçün yaradılır. Bundan başqa, bank ərəb ölkələrinin maliyyə bazarlarına çıxmağı planlaşdırır.

"Biz bu sahədə müvafiq qanunvericiliyin qəbul edilməsi təşəbbüsü ilə çıxış edəcəyik, çünki Azərbaycandakı mövcud qanunvericilik islam bankçılığının fəaliyyətini bir tərəfdən qadağan etmir, digər tərəfdən isə bu sahəni tənzimləmir", - Hacıyev qeyd edib.

Mayın 12-də tenderdə iştirak üçün sənədlərin qəbulu başa çatıb. Tenderdə iştiraka 7 şirkət buraxılıb.

2011-ci il iyunun 6-da ABB-nin baş ofisində tender təkliflərinin açılışı olacaq və komissiya onları qiymətləndirməyə başlayacaq.

Tenderin yekunları elan edildikdən sonra beş iş günü ərzində bank xidmətlərin göstərilməsinə dair məsləhətçi ilə müqavilə imzalayacaq. Bundan sonra bir həftə ərzində artıq məsləhətçinin bankın işçi qrupu ilə birgə işi başlayacaq.

Layihənin birinci mərhələsini yayda başa vurmaq planlaşdırılır. 2011-ci ilin payızında islam bankçılığının məhsul və xidmətlərinin göstərilməsi üzrə xüsusləşdirilmiş qurumun təqdimatı keçiriləcək.

ABB xarici banklar arasında ilk dəfə olaraq öz nümayəndəliyini Dubayın azad iqtisadi zonasında deyil, BƏƏ-nin ümumi bazarında açıb. Hazırda BƏƏ-dəki nümayəndəliyin filiala çevrilməsi ilə bağlı iş aparılır.

ABB Qətərin beynəlxalq maliyyə zonasında törəmə bankın açılması ilə bağlı hazırlıq işləri də aparır.

Qətərdəki törəmə bank ABB-nin maliyyə qrupunun üçüncü törəmə bankı olacaq. Birinci bank - "ABB-Moskva" öz fəaliyyətinə 2002-ci ildə başlayıb. Hazırda bu, Moskva, Sankt-Peterburq və Yekaterinburqda 12 ofisi və filialı ilə özünü doğrultmuş maliyyə institutudur. 2006-cı ilin noyabrında ABB Azərbaycandan kənarda özünün ikinci törəmə bankını - "ABB-Gürcüstan"ı təsdiq edib.

ABB 1992-ci ildə "Xarici iqtisadiyyat bankı"nın varisi kimi yaradılıb. ABB Azərbaycanın bank sektorunda aparıcı yer tutur. Bankın nizamnamə kapitalında dövlətin payı 50,2 faiz təşkil edir, qalan pay isə fərdi hüquqi və fiziki şəxslər arasında bölüşdürülüb.

Xəbər lenti

Xəbər lenti