Azərbaycan, Bakı, 13 iyun /Trend, müxbir N.İsmayılova/
Beynəlxalq Maliyyə Korporasiyası (BMK) və Azərbaycanda aparıcı mikromaliyyə şirkəti "FINCA Azerbaijan" 7 milyon dollar məbləğində kredit xəttinin verilməsinə dair saziş imzalayıblar. Trend-in məlumatına görə, bu barədə bazar ertəsi BMK-nın məlumatında deyilir.
Kredit vəsaitləri şirkət tərəfindən ölkədə mikro və kiçik biznesin inkişafı üçün istifadə ediləcək. Hazırda "FINCA Azerbaijan" uzunmüddətli maliyyələşdirməyə səy göstərir ki, dinamik inkişaf etsin və öz müştərilərinə yeni məhsullar təqdim etsin.
Layihə "FINCA Azerbaijan"ın maliyyələşdirmənin şaxələndirilməsi və həcminin artırılması, eləcə də öz aktiv və passivlərinin daha səmərəli idarə edilməsi üzrə səylərini dəstəkləyəcək.
"FINCA Azerbaijan" 1998-ci ildə yaradılıb və 84 milyon dollarlıq kredit portfeli ilə Azərbaycanda mikromaliyyə bazarının liderlərindən biridir. "FINCA Azerbaijan" mənzil-qərargahı Vaşinqtonda yerləşən qeyri-kommersiya təşkilatı "FINCA International, Inc"yə məxsusdur.