Azərbaycan, Bakı, 23 iyun /Trend, müxbir N.İsmayılova/
Azərbaycanda Beynəlxalq Maliyyə Korporasiyasının "Azərbaycanda və Orta Asiyada maliyyə infrastrukturunun gücləndirilməsi" layihəsi (ACAFI) üzrə özəl kredit bürosunun fəaliyyətinin ilkin mərhələsində 5 səhmdarı olacaq. Bu barədə cümə axşamı Trend-ə BMK-nın Azərbaycandakı layihəsinin əlaqələndiricisi Teymur Heybətov deyib.
"Sonradan beynəlxalq tərəfdaşın cəlb edilməsi planlaşdırılır. O, təkcə proqram tədarükçüsü deyil, həm də büronun səhmdarı olacaq. Nəzərdə tutulur ki, kredit bürosunun operatoru məhz bu beynəlxalq tərəfdaş olacaq", - Heybətov qeyd edib.
Onun sözlərinə görə, hazırda ölkədə özəl kredit bürolarının fəaliyyətini tənzimləyən qanun layihəsi hazırdır və Azərbaycan Mərkəz Bankında baxılmaqdadır. Bundan başqa, anlaşma memorandumunun mətni də razılaşdırılıb və bütün potensial səhmdarlar tərəfindən imzalanacaq, eləcə də kredit bürosunun biznes planının hazırlanması başa çatmaq üzrədir.
Baza məlumatlarının yaradılması üçün özəl kredit bürosuna 2-3 il lazımdır. Buna görə də AMB yanında 2005-ci ildən fəaliyyət göstərən Mərkəzləşdirilmiş Kredit Reyestri Xidmətinin mövcud bazasından istifadə nəzərdə tutulur. Bu məqsədlə AMB ilə hazırda tariflər və digər məsələlərlə bağlı danışıqlar aparılır.
Fəaliyyətin bu növ sxemi nəzərdə tutulur - özəl kredit bürosu reyestrdən məlumatlar alacaq və sonradan onları sorğu verən maliyyə institutlarına ötürəcək. Bundan başqa, büro müstəqil surətdə kommunal xidmətlər, telekommunikasiya, lizinq şirkətlərindən, eləcə də maliyyə institutlarından təhlilin əhatə dairəsni genişləndirmək məqsədilə məlumatlar toplayacaq. Büroda məlumatların emalı onlayn rejimdə aparılacaq.
"Hazırda AMB qiymətqoymanın 3 modelini təklif edir: büro tərəfindən Mərkəzləşdirilmiş Kredit Reyestri Xidmətinə illik ödəniş, hər müraciətə görə ödəniş və lisenziyanın alınması üçün birdəfəlik ödəniş", - o bildirib.
Heybətovun sözlərinə görə, büro müxtəlif qiymət tarifləri üzrə hesabatların müxtəlif növlərini - minimal, standart və təkmilləşdirilmiş növləri hazırlayacaq. Onlar informasiyanın həcminə və məlumat tutumuna görə fərqlənəcəklər. Bu məhsulların təqdim edilməsi müştərinin fırıldaqçılığının yoxlanılmasını gücləndirməyə, onun kredit fəallığının monitorinqini aparmağa imkan verəcək.
"Hadisələr tez məcra edəcəyi halda, qanun layihəsi yalnız gələn il qəbul edilə bilər. Bundan sonra büro AMB-dən lisenziyalaşdırmadan keçməli və beynəlxalq tərəfdaşın texniki həllərini tətbiq etməli olacaq", - Heybətov qeyd edib. Bu proseslərə minimal xərclər nəzərə alınmaqla, büro 2013-cü ilin yazından tez fəaliyyətə başlaya bilməz.
ACAFI layihəsinin məqsədi Orta Asiya (Qırğızıstan, Tacikistan və Özbəkistanda) və Azərbaycanda maliyyə bazarları infrastukturlarının kredit məlumatı mübadiləsinin effektiv sisteminin yaradılması və maliyyə institutlarının əməkdaşları arasında risklərin idarə edilməsi sahəsində peşəkar tədrisin və sertifikatlaşdırmanın tətbiqi yolu ilə təkmilləşdirilməsidir. Layihənin fəaliyyəti maliyyə müəssisələrinə daha tez və düzgün kredit qərarlarının qəbul edilməsində kömək edəcək və beləliklə, fərdi istehlakçılar, eləcə də regiondakı kiçik və orta müəssisələr üçün maliyyə xidmətlərindən istifadəni artıracaq. Bu üçillik layihə İsveçrə hökuməti ilə əməkdaşlıq çərçivəsində həyata keçirilir.
