Azərbaycan, Bakı, 11 iyul /Trend, müxbir İ.Xəlilova/
KfW Almaniya İnkişaf Bankı Azərbaycanda fəaliyyət göstərən Kredit-Zəmanət Fondu (KZF) vasitəsilə birinci zəmanəti almağa yeganə namizəd olan Azərbaycan bankı "Bank of Baku"nun qiymətləndirilməsini başa çatdırıb. Bu barədə bazar ertəsi Trend-ə KfW-nin Bakı ofisindən məlumat verilib.
Zəmanətin "CommerzBank"ın kredit xətti ilə veriləcəyi ehtimal olunur.
"Bu məqsədlə KfW-nin maliyyə layihələri üzrə meneceri Herald Hüqner iyulun 3-dən 9-dək Bakıda səfərdə olub", - ofisdən bildiriblər.
Zəmanətin verilməsinə dair KfW-nin yekun qərarı sentyabrın sonlarında - bankın missiyasının növbəti səfəri zamanı qəbul ediləcək. Həmin səfər zamanı "Bank of Baku" ilə müqavilənin imzalanması mümkündür.
Yaradılan fondun KfW tərəfindən maliyyələşdirilməsinə dair müqavilə 2006-cı il avqustun 14-də Bonnda Azərbaycan-Almaniya hökumətlərarası danışıqlar zamanı bağlanıb, Azərbaycanda KZF-in yaradılmasına dair maliyyə əməkdaşlığı üzrə hökumətlərarası saziş isə ölkə Prezidenti tərəfindən 2007-ci il iyunun 5-də imzalanıb.
2008-ci ilin avqustunda KfW Azərbaycan İqtisadi İnkişaf Nazirliyi ilə Almaniyanın Əmanət Kassaları üzrə Beynəlxalq Əməkdaşlıq Fondunun (SBFIC) işə başlaması haqqında müqavilə bağlayıb. Lakin ötən müddət ərzində Azərbaycan banklarının cəlb etdiyi xarici borclar üçün heç bir zəmanət verilməyib. Belə vəziyyət dünya maliyyə böhranı ilə əlaqədar mürəkəbləşib. Nəticədə Avropa bankları kredit xətlərinin verilməsinə hazır olmayıblar.
Kredit-Zəmanət Fondunun texniki meneceri Andreas Frankenin əvvəllər dediyinə görə, zəmanət Almaniya-Azərbaycan Fondunun tərəfdaşlarından birinə - "Bank of Baku", "Bank Respublika", "Unibank" "Parabank", "DəmirBank" və "AGBank"a verilə bilər. KZF-in başlıca şərti ondan ibarətdir ki, fondun zəmanəti əsasında cəlb edilən vəsaitlər Fondun biznes-sxemi üzrə orta və kiçik biznesin inkişafına yönəldilməlidir və ya banklar bu sektorda yerləşdirilən elə eyni məbləğdə portfeli yaratmalıdırlar.
Kredit-Zəmat Fondu KfW-nin mənzil-qərargahında hesablaşma hesabı şəklində fəaliyyət göstərməlidir. Azərbaycan banklarının müraciət edəcəyi halda, məsləhətçi onları yoxlayacaq və KfW qarşısında zəmanətin verilməsi ilə bağlı çıxış edəcək.
KfW Azərbaycana Kredit-Zəmanət Fondunun yaradılmasına 4 milyon avro verib. Bunun 3,75 milyon avrosu fondun yaradılmasına zəmanət qismində, 0,25 milyon avro isə məsləhətçi xidmətlərinin ödənilməsinə görədir. Qalan vəsaitlər Fonda Azərbaycan hökuməti tərəfindən köçürülüb.
KZF-in zəmanəti cəlb edilən kredit məbləğinin 90 faizi həcminə qədər verilə bilər, buna müvafiq olaraq qalan 10 faiz bankın şəxsi riski altında olacaq.
