Azərbaycan, Bakı, 1 avqust /Trend, müxbir N.İsmayılova/
Azərbaycan bankı "Kapital Bank" "Xəzri" pul köçürmələri sisteminin əhatəsini genişləndirməyi planlaşdırır. Bu barədə bazar ertəsi Trend-ə bankın idarə heyətinin sədr müavini Yaşar Məmmədov deyib.
"Artıq ötən ildən Moskva şəhərində "Xəzri" sisteminin istifadəsinə başlanılıb. Yaxın gələcəkdə onun digər ölkələrdə də tətbiqi planlaşdırılır", - Məmmədov bildirib.
Onun sözlərinə görə, "Xəzri"nin populyarlığı aşağı tariflər və köçürmələrin sadə olması ilə izah edilir.
Kapital Bankın "Xəzri" sürətli pul köçürmələri sistemi 2007-ci ildə yaradılıb. Bu günə sistem bankın 100-dən çox filial və məntəqələrində fəaliyyət göstərir və respublikanın istənilən regionuna sürətli pul köçürmələri etmək imkanını yaradır. Üç il ərzində sistem üzrə vəsait dövriyyəsi 50 milyon manat təşkil edir.
"Kapital Bank"ın Rusiyanın "Stoliçnıy Kredit" bankı ilə apardığı danışıqlar nəticəsində mövcud proqram təminatı yeniləşdirilib və Moskva şəhərində xidmət məntəqələrinin açılmasına dair müqavilə imzalanıb.
Keçmişdə "Kapital Bank" Birləşmiş Universal Səhmdar Bankı (BUS Bank) adlanıb. Öz növbəsində Birləşmiş Universal Səhmdar Bankı Nazirlər Kabinetinin 21 fevral 2000-ci il tarixli 40 "s" nömrəli sərəncamı ilə açıq tipli səhmdar cəmiyyəti formasında yaradılıb. BUSBank üç dövlət səhmdar-kommersiya bankının - Aqrar-Sənaye, Sənaye-İnvestisiya və Əmanət banklarının sağlam aktiv və öhdəliklərinin birləşdirilməsi nəticəsində yaradılıb.
2008-ci ilin yayınadək "Kapital Bank" tamamilə dövlət mülkiyyətində olub. Hazırda "Kapital Bank"ın səhmdarı "Paşa Holdinq"dir. Ona səhmlərin 97,75 faizi məxsusdur.
"Kapital Bank"ın aktivləri 2011-ci ilin birinci yarısında 11,8 faiz artaraq iyulun 1-nə 874,4 milyon manat təşkil edib. Bankın məcmu kapitalı 71,88 milyon manat, nizamnamə kapitalı isə 30 milyon manat təşkil edib.
Avqustun 1-nə olan rəsmi məzənnə 0,7865 AZN/USD təşkil edir.