Azərbaycan, Bakı, 1 avqust /Trend, müxbir İ.Xəlilova/
Dünya Bankı (DB) sentyabrın ortalarında Azərbaycan hökuməti ilə 50 milyon dollar məbləğində "Məcburi köçkünlərin iqtisadi inkişafına yardım" layihəsi üçün yeni kredit üzrə danışıqların sonuncu mərhələsini aparmağı planlaşdırır. Bu barədə bazar ertəsi Trend-ə DB-nin Bakı nümayəndəliyindən bildirilib.
Layihənin ümumi dəyəri 74,5 milyon dollar qiymətləndirilir.
Azərbaycan hökuməti layihənin dəyərinin 25 faizini və vergilərin ödənilməsi (ƏDV) üzrə xərcləri maliyyələşdirəcək.
"Məcburi köçkünlərin iqtisadi inkişafına yardım" layihəsi (IDP EDSP) çərçivəsində bank Azərbaycana Beynəlxalq İnkişaf Assosiasiyasının (BİA) xətti ilə güzəştli şərtlərlə artıq 3 kredit - 10 milyon dollar, 11,5 milyon dollar və 15 milyon dollar ayırıb.
Dördüncü kredit Beynəlxalq Yenidənqurma və İnkişaf Bankının (BYİB DB qrupuna daxildir) şərtləri əsasında veriləcək ki, Azərbaycanın artıq BİA-nın güzəştli kreditlərindən istifadə hüququ yoxdur.
DB nümayəndəliyindən dediklərinə görə, digər fərqləndirici cəhət odur ki, yeni layihədə yeni komponentlər meydana gəlib. Birincisi, məcburi köçkünlərin icmaları infrastruktur sahəsində DB-nin kreditləri hesabına mikrolayihələrin həyata keçirilməsində imkan əldə edəcəklər.
İkincisi, məcburi köçkünlər üçün məşğulluğun artırılması məqsədilə treninqlər təşkil ediləcək. Onlar ixtisas üzrə gələcəkdə işlə təmin olunmaları üçün təlim keçəcəklər. Üçüncüsü, layihəyə mikrokredit komponenti daxil edilib.
"Layihə bütün ölkəni əhatə edir və məcburi köçkünlərin yaşadığı regionlar üzrə heç bir məhdudiyyət nəzərdə tutulmur", - bankın nümayəndəliyindən bildiriblər.
Nümayəndəlikdə istisna etmirlər ki, DB-nin Azərbaycana bu istiqamətdə köməyi davam edəcək və gələcəkdə yardım azad olunan ərazilərin [Azərbaycanın ərazisinin 20 faizi işğal altındadır] bərpası işində də göstərilə bilər.
Layihənin birinci mərhələsinin dəyəri 12,6 milyon dollar təşkil edir. Bunun 11,5 milyon dolları DB-nin kreditinin hesabına ayrılıb. Təcrübəyə zidd olaraq, layihə üzrə vəsait bir il tez mənimsənilib, lakin inflyasiya prosesləri ilə əlaqədar nəzərdə tutulan 200 infrastruktur mikrolayihə başa çatdırılmayıb. Bu səbəbdən əlavə vəsaitlər tələb olunub. Layihənin başa çatdırılması üçün cəmi 24,19 milyon dollar ayrılıb. Bundan 9,6 milyon SDR (15 milyon dollar) DB-nin, 8,69 milyon dollar (3,69 milyon dollar məbləğində ƏDV nəzərə alınmaqla) ölkə hökumətinin payına düşür.
Layihənin 31 dekabr 2011-ci ildə başa çatdırılması planlaşdırılır.
Layihənin həyata keçirilməsinin yekunları üzrə 108 min məcburi köçkün bundan faydalanacaq.
Dünya Bankı Azərbaycanda məcburi köçkünlərin dəstəklənməsi üçün cəmi üç kredit ayırıb. 10 milyon dollar məbləğində birinci kredit 2001-ci ildə ayrılıb. Həmin vəsaitlərin hesabına məcburi köçkünlərin müvəqqəti sıx yaşadıqları yerlərdə infrastrukturun bərpası üzrə 192 mikrolayihə maliyyələşdirilib. Bu layihənin həyata keçirilməsindən 170 min nəfər faydalanıb.
