Azərbaycan, Bakı, 4 avqust /Trend, müxbir İ.Xəlilova/
Ümumdünya Ticarət Təşkilatının (ÜTT) işçi qrupu ilə növbəti görüş (çoxtərəfli danışıqların IX raundu) 2011-ci ilin noyabrı - dekabrın əvvəlindən tez keçirilməyəcək. Trend-in məlumatına görə, bu barədə cümə axşamı danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib. Bundan əvvəl danışıqlar oktyabra nəzərdə tutulmuşdu.
"Hazırda ÜTT-nin bütün aparıcı üzvləri Rusiyanın bu təşkilata daxil olmasına cəlb ediliblər. Buna görə də bəzi ölkələr Azərbaycan ilə ikitərəfli danışıqları işçi qrupunun görüşü çərçivəsində keçirmək istəyiblər", - nazir müavini qeyd edib.
Ötən ay [25-29 iyul] Cenevrədə Azərbaycan nümayəndə heyəti Aİ, Ekvador, İsveçrə, Braziliya və Çin ilə danışqılar aparıb. Halbuki ölkə ÜTT-yə üzv olan 12 ölkə ilə danışıqlar prosesindədir.
Məmmədquliyevin sözlərinə görə, bəzi ölkələr, o cümlədən ABŞ görüşləri çoxtərəfli danışıqlar zamanı keçirmək istəyini bildirib.
ÜTT-nin işçi qrupu ilə görüşün keçirilmə müddəti də təxirə salınıb. Bu onunla əlaqədardır ki, təşkilatın katibliyinə icmal hesabatının (Factual Summary) hazırlanması üçün vaxt lazımdır.
"Azərbaycan tərəfi ÜTT-nin üzv ölkələrinin suallarına cavablarını təqdim edib. Bunun əsasında katiblik "Factual Summary" hazırlayacaq. O, ölkələrə göndəriləcək", - nazir müavini vurğulayıb.
Bu gün Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti, Kanada və İsveçrə ilə ikitərəfli danışıqlar aparır.
Sonuncu görüş [VIII mərhələ] 2010-cu il oktyabrın 18-də keçirilib. Oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nin digər üzvləri ilə ticarət və xidmət məsələləri üzrə ikitərəfli danışıqlar aparılıb.
Azərbaycan danışıqlara 2004-cü ildən başlayıb.
Azərbaycan bu günədək Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalamaya razılıq verib.
Məmmədquliyev yaxın gələcəkdə hər hansı ölkələrdən biri ilə danışıqların başa çatması imkanını istisna etməyərək, onun adını çəkməkdən imtina edib.
Danışıqlar çərçivəsində Azərbaycan milli hüquqi bazanın ÜTT-nin tələblərinə uyğunlaşdırılması, qüvvədə olan ticarət rejiminin təkmilləşdirilməsi üzrə işləri davam etdirir. Təxminən 40-50 qanunvericilik aktı təşkilatın tələblərinə uyğunlaşdırılmalıdır ki, onlardan təxminən 30 sənəd artıq vahid şəklə salınıb və gələn il bu istiqamətdə işlər davam etdiriləcək.
Ötən il ÜTT katibliyi Azərbaycan üzrə işçi qrupunun tərkibini genişləndirib və oraya daha dörd ölkəni - Ukrayna, Braziliya, Ekvador və İsveçrəni daxil edib. Bunun nəticəsində işçi qrupunun üzvlərinin ümumi sayı Aİ-nin 27 ölkəsi də daxil olmaqla, 32-yə çatıb.
ÜTT yanında Azərbaycan üzrə işçi qrupu 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.
