Azərbaycan, Bakı, 29 sentyabr /Trend, müxbir A.Axundov/
Azərbaycanın Mərkəzi Bankı və digər dövlət orqanlarına Qazaxıstan Milli Bankının əskinas fabriki ilə əməkdaşlıq imkanlarını öyrənmək tövsiyə olunub. Trend-in məlumatına görə, bu barədə iqtisadi əməkdaşlıq üzrə Azərbaycan-Qazaxıstan hökumətlərarası komissiyasının cümə axşamı keçirilən VIII iclasının yekunlarına dair imzalanmış protokolda qeyd edilir.
"Azərbaycan Mərkəzi Bankı və Qazaxıstan Milli Bankının əskinas fabriki müntəzəm görüşlər keçirir və gələcək əməkdaşlıq perspektivlərini müzakirə edir. Komissiya tərəflərə bu sahədəki subyektlər arasında əlaqələrin tənzimlənməsi imkanlarının öyrənilməsini gücləndirməyi tövsiyə edir", - protokolda deyilir.
Bundan əlavə, komissiya qeyd edir ki, Qazaxıstan Milli Bankının əskinas fabriki 2009-cu ildə Azərbaycanın Qiymətli Kağızlar üzrə Dövlət Komtəsində bütün növ qiymətli kağızların blanklarının hazırlanması və satışına dair fəaliyyətə lisenziya alıb.
Azərbaycan manatının dizaynı Avstriyanın valyuta dizayneri Robert Kalina tərəfindən hazırlanıb. O, həmçinin müasir avro əskinaslarının da dizayneridir. Mərkəzi Bankın sifarişi ilə əskinaslar Britaniya şirkəti "De La Rue" tərəfindən çap olunub.