Azərbaycan, Bakı, 13 oktyabr /Trend, müxbir E.İsmayılov/
Azərbaycanın dəmiryollarında sərnişindaşıma tariflərinin qalxması nəzərdə tutulmur. Trend-in məlumatına görə, bu barədə cümə axşamı jurnalistlərə "Azərbaycan Dəmir Yolları" QSC-nin rəhbəri Arif Əsgərov bildirib.
"Sərnişindaşıma tariflərində dəyişiklik gözlənilmir", - o deyib.
Fevralın 1-dən etibarən Azərbaycanda yeni tariflər qüvvəyə minib. Tariflərə əsasən, istiqamətindən və məsafəsindən asılı olaraq adi qatarlarda qiymətlər 3-19 manat, sürət qatarlarında isə 14-25 manat təşkil edir.
"Sərnişindaşımada tariflər orta hesabla iki dəfə bahalaşıb. Tariflərin qalxmasından əldə olunan əlavə vəsaitlər sərnişindaşımanın keyfiyyətinin yaxşılaşdırılmasına, xüsusilə də vaqonların təmirinə, sərnişinlər üçün rahat şəraitin təmin olunmasına və yataq dəstlərinin yenilənməsinə yönələcək", - əvvəllər Nəqliyyat Nazirliyindən məlumat verilib.
Tariflərin dəyişməsi nəticəsində "Azərbaycan Dəmir Yolları" QSC-nin əlavə gəlirləri 13 milyon manat məbləğində gözlənilir. Bu gəlirlər dəmiryollarının maliyyə imkanlarını genişləndirməyə və təqdim olunan xidmətlərin keyfiyyətlərinin artırılmasına imkan verəcək.
Biletlərin qiymətlərinə yataq dəstlərinə sərf olunan xərclər və komissiyaların da daxil edilməsinə baxmayaraq, yeni tariflər MDB dövlətləri arasında tətbiq olunan tariflərdən aşağıdır.
Oktyabrın 13-nə olan rəsmi məzənnə 0,7868 AZN/USD təşkil edir.
...
