MDB Maliyyə-Bank Şurası Xəzər İnkişaf Bankının yaradılmasını təklif edir
Azərbaycan, Bakı, 1 dekabr /Trend, müxbir A.Axundov/
MDB Maliyyə-Bank Şurası Xəzər İnkişaf Bankının yaradılmasını təklif edir.
"Xəzəryanı region böyük imkanlara malikdir. Ona görə də bizə bu zonanın dirçəlməsi üçün maliyyə alətləri lazımdır. Bu regionda maliyyələrin, iqtisadiyyatların çox güclü düyünü cəmləşib və biz bu düyünü yavaşca açmalıyıq", - Trend-in məlumatına görə, cümə axşamı Bakıda keçirilən MDB iştirakçısı olan ölkələrin beynəlxalq bank konfransında MDB Maliyyə-Bank Şurası Əlaqələndirmə Şurasının sədri Anatoli Kazakov bildirib.
"Bizi Xəzəryanı ölkələr arasında mal dövriyyəsinin çox aşağı olması son dərəcə narahat edir. Əgər bütün ölkələr Gömrük İttifaqına daxilolma mərhələsinə, vahid iqtisadi məkana keçsəydilər, mal dövriyyəsi dəfələrlə artardı. Xəzərdə isə bizə sərhədlər mane olur, çünki dövlətlər dənizin statusu məsələsini heç cür həll edə bilmirlər. Görünür, bu prosesdə bizə Xəzər iqtisadi əməkdaşlığının nizamlanması və Xəzər İqtisadi Forumunun yaradılması vacibdir", - Kazakov deyib.
O, həmçinin MDB məkanında islam bankının yaradılmasını məqsədəuyğun hesab edir, çünki o, uzun və ucuz pulları cəlb etməyə imkan verər.
"Təəssüf ki, bu planda biz Avropa ölkələrindən geri qalırıq, çünki bu gün Avropada çoxlu sayda islam bankları fəaliyyət göstərir. Sabah biz bank konfederasiyaları çərçivəsində bu məsələni həll etmək niyyətindəyik", - Kazakov qeyd edib.
