Azərbaycan, Bakı, 1 dekabr /Trend, müxbirlər E.İsmayılov, K.Zərbəliyeva/
Azərbaycanda Kür çayı üzərində Hacıqabul-Bəhramtəpə avtomobil yolunda yerləşən körpünün əsaslı təmirə bağlanması imkanı nəzərdən keçirilir. Bu barədə cümə axşamı Trend-ə Azərbaycan Nəqliyyat Nazirliyindəki mənbə deyib.
Onun sözlərinə görə, Türkiyənin "Kolin İnşaat" şirkəti bu körpünün əsaslı təmirinin həyata keçirilməsi təşəbbüsü ilə ölkə hökumətinə müraciət edə bilər. Müraciət bu ilin dekabrın 15-nə qədər təqdim edilə bilər.
Bu körpüdə əsaslı təmirin aparılması zərurətinin əsas səbəbi odur ki, onun üzərindən iritonnajlı avtomobillər keçir. Körpü dəfələrlə bərbad vəziyyətə düşüb və orada təmir işləri aparılıb.
Mənbə bildirib ki, əsaslı təmir barədə qərar qəbul edilərsə, körpüdə gediş 40 günlüyə bağlana bilər.
Onun sözlərinə gərə, alternativ yol qismində Kürdəmir rayonu ərazisindən keçən avtomobil yolu istifadə edilə bilər.
Cümə axşamı Baş Dövlət Yol Polisi İdarəsinin şöbə rəisi Kamran Əliyev Trend-ə deyib ki, hazırda körpüdə piyadalar üçün səki yaradılması üzrə işlər aparılır və bu işlər avtomobillərin körpü üzərindən hərəkətinə heç cür təsir etməyib.
