Azərbaycan, Bakı, 21 dekabr /Trend, müxbir N.İsmayılova/
Azərbaycanın Milli Depozit Mərkəzi (MDM) və Türkiyənin mərkəzi depozitarisi "Takasbank" müxbir münasibətlərinin qurulması prosesini 2012-ci ildə başa çatdıracaq. Bu barədə çərşənbə günü Trend-ə MDM-in idarə heyətinin sədri Fariz Əzizov deyib.
"Müxbir hesabları qiymətli kağızlar bazarının vacib tərkib hissəsidir. Bu gün bizim üçün fəaliyyətimizin vacib istiqaməti qiymətli kağızların emitentləri haqqında təhlükəsiz və şəffaf məlumatın ötürülməsidir. Bununla bağlı olaraq, biz Türkiyə tərəfi ilə müxbir münasibətlərinin təşkil edilməsi üzrə təşəbbüs göstərdik", - o vurğulayıb.
Onun sözlərinə görə, bu layinənin həyata keçirilmə vaxtı depozitarilər arasında texniki sazişin bağlanması müddətindən asılı olacaq.
"Çünki Türkiyə depozitariləri bir elektron platformadan istifadə edirlər, MDM isə digər. Məlumatın ötürülmə formatı razılaşdırılmalıdır. Güman edirəm ki, 2012-ci ildə bu münasibətlər qurulacaq", - o deyib.
Noyabrın sonunda Türkiyənin Əməkdaşlıq və İnkişaf üzrə Beynəlxalq Agentliyinin (TİKA) dəstəyi ilə tərkibində MDM əməkdaşlarının olduğu nümayəndə heyəti İstanbulda türkiyəli həmkarları ilə bir sıra görüşlər keçirib. Görüşlər Türkiyənin milli depozitarisi "Takasbank" və Mərkəzi Reyestr Quruluşunun nümayəndələri ilə keçirilib.
MDM 1997-ci il sentyabrın 18-də yaradılıb. Mərkəzin təsisçisi və bütün səhm zərfinin mülkiyyətçisi kimi Azərbaycan Dövlət Əmlak Komitəsi çıxış edirdi.
QKDK-nın yaradılmasından sonra MDM onun ixtiyarına verilib. Bununla əlaqədar olaraq MDM QKDK tərəfindən 1999-cu ilin 8 sentyabrında yenidən təsis olunub və 1999-cu il sentyabrın 17-də dövlət qeydiyyatından keçib.