Azərbaycan, Bakı, 26 dekabr /Trend, müxbir N.İsmayılova/
Azərbaycan bankı "Bank of Baku"nun balans mənfəəti cari ilin dekabr ayının əvvəlinə 26,16 milyon manat artıb. Trend-in məlumatına görə, bu barədə bazar ertəsi bankın balans hesabatında deyilir.
Dekabrın əvvəlinə bankın gəlirləri 66,6 milyon manat təşkil edib. Bankın aktivləri ilin əvvəlindən 23,4 faiz artaraq dekabrın 1-nə 302,533 milyon manat olub.
Bankın depozit portfeli noyabrın yekunları üzrə 223,22 milyon manat artıb ki, bunun 172,6 milyon manatını fiziki şəxslərin əmanətləri, 167,3 milyon manatını isə təcili depozitlər təşkil edib.
Dekabrın 1-nə olan vəziyyətə görə, "Bank of Baku"nun kredit portfeli 256,4 milyon manat artib ki, bunun 209,4 milyon manatı istehlak kreditlərinə, 44,9 milyon manatı isə kommersiya kreditlərinə yönəlib.
Bankın ümumi kapitalı 58,1 milyon manat təşkil edir. Bankın ödənilmiş nizamnamə kapitalı 26,18 milyon manata bərabərdir.
"Bank of Baku" 2005-ci ildə iki yerli bankın - "Bank of Baku" ASC və "İlkBank"ın birləşməsi nəticəsində təsis olunub. Hazırda bankın səhmlərinin 40 faizi Türkiyənin şirkətlər qrupu NAB-a, 10 faizi Elçin İsayevə (bankın idarə heyətinin sədri), 29 faizdən çoxu "Azpetrol"a və 21 faizə yaxını fiziki şəxs və "Azİnvest" şirkətinə məxsusdur.
Dekabrın 26-na olan rəsmi məzənnə 0,7863 AZN/USD təşkil edib.
