Azərbaycan, Bakı, 2 yanvar /Trend müxbir A.Axundov/
Noyabrda Bakıda 1 sot torpağın qiyməti orta hesabla 0,6 faiz artaraq 13 462 dollardan 13 548 dollara çatıb. Bu barədə bazar ertəsi Trend-ə "Əmlak Bazarı İştirakçıları" İctimai Birliyindən məlumat verilib..
Məlumata görə, bu, əsasən şəhərin birinci və ikinci zonalarında, yəni mərkəzi rayonlarda və mərkəzə yaxın ərazilərdəki qiymət artımı ilə bağlıdır.
Noyabrda ən əhəmiyyətli qiymət artımı Qaradağ rayonunda (1,1 faiz), ən çox azalma isə Xətai rayonunda (0,8 faiz) müşahidə edilib.
Yasamal və Xətai rayonları torpaq bazarında daha aktiv olublar. Ən passiv isə Nərimanov rayonu olub.
Məlumata əsasən, noyarda bazara ən bahalı torpaq sahəsi Nəsimi rayonunda təklif edilib. Belə ki, 1 sot torpaq sahəsi (Çay fabrikinin yaxınlığında) 350 min dollara təqdim edilib. Ən ucuz torpaq sahəsi isə Abşeron rayonunda (Pirəkəşükül qəsəbəsi) qeydə alınıb. Burada 1 sot torpaq 350 dollara təklif edilib.
Noyabrda paytaxtın torpaq bazarında 763,7 hektar torpaq təklif edilib, onlardan 79,3 faizi boş sahələr olub, qalanı isə qeyri-yaşayış və köhnə yaşayış sahələrinin payına düşüb.
Bazarda torpağın ekspozisiya müddəti əvvəlki ayla müqayisədə 0,4 faiz artıb.