Azərbaycan, Bakı, 11 yanvar /Trend, müxbir A.Axundov/
Azərbaycan Kənd Təsərrüfatı Nazirliyi sahibkarlara heyvandarlıq sahəsində tövsiyələr təqdim edib. Trend-in məlumatına görə, bu barədə çərşənbə günü nazirliyin yaydığı məlumatda deyilir.
Tövsiyələr damazlıq düyələrin mühafizəsi, saxlanması və baş sayının artırılmasını nəzərdə tutur.
Son 3 ildə dövlət lizinq təşkilatı "Aqrolizinq" ASC tərəfindən ölkəyə 2875 baş damazlıq düyə gətirilərək heyvandarlıq məhsulları istehsalçılarına satılıb.
O cümlədən, 2011-ci ildə Almaniyadan Azərbaycana 1195 baş holştin-friz cinsindən olan damazlıq düyə gətirilib.
"2011-ci ildə 1600 baş holştin-friz cinsindən olan damazlıq düyənin gətirilməsi planlaşdırılırdı, qalan 405 baş düyə bu il fevralın 10-dək gətiriləcək", - məlumatda qeyd edilir.
Hazırda ölkədə damazlıq düyələrin sayı 4500 başa çatıb.