Azərbaycan, Bakı, 16 yanvar /Trend, müxbir N.İsmayılova/
Dünya Bankının (DB) Avropa və Mərkəzi Asiyanın kənd təsərrüfatı və kənd yerlərinin inkişafı şöbəsinin rəhbəri Dina Umali Deyningerin rəhbərlik etdiyi missiya Azərbaycana gələcək. Bu barədə bazar ertəsi Trend-ə bankın Bakı nümayəndəliyindən məlumat verilib.
Səfər ölkədə kənd təsərrüfatının inkişafı və kreditləşdirilməsi proqramının III fazasına hazırlıq məqsədilə keçirilir.
Məlumata görə, missiya yanvarın 30-da gələcək və bir həftə ölkədə olacaq.
2006-cı ilin payızında Azərbaycanla DB arasında kənd təsərrüfatının inkişafı və kreditləşməsi proqramının ikinci mərhələsi üzrə kredit sazişi imzalanıb. Bu layihənin həyata keçirilməsi fermerlərin gəlirlərinin və kənd təsərrüfatı müəssisələrinin səmərəliliyinin artmasına xidmət edir. Layihə 2007-ci ildən həyata keçirilməyə başlayıb, 4 il üçün nəzərdə tutulub.
Layihənin ümumi dəyəri 59,5 milyon dollar təşkil edir, Dünya Bankının kreditinin payına 30 milyon dollar düşür. Beynəlxalq İnkişaf Assosiasiyasının (BİA) vəsaitlərindən 20,5 milyon dollar, 8 milyon dollar BİA şərtlərinin sərtləşdirilməsi üçün ayrılıb. Bu da 35 il müddətinə ödənişi 10 il güzəştli olmaqla, libor 2 faiz dərəcəsi ilə hesablanıb.
