Azərbaycan, Bakı, 16 yanvar /Trend, müxbir N.İsmayılova/
Azərbaycanda metanol istehsalı 2012-ci ilin üçüncü rübündə təşkil ediləcək. Bu barədə bazar ertəsi Trend-ə "AzMeCo" şirkətindən məlumat veriblər. Şirkət əvvəllər istehsala 2012-ci ilin ikinci rübündə başlamağı planlaşdırırdı.
"Zavodda tikinti işlərinin başa çatdırılması 2012-ci ilin mayına planlaşdırılıb. Hazırda tikinti işlərinin 95 faizi başa çatıb", - şirkətdən deyiblər.
Bir müddət əvvəl zavodun tikintisinin 2011-ci ilin sonuna qədər yekunlaşdırılması nəzərdə tutulurdu.
Zavodun layihə gücü ildə 560 min ton təşkil edir. Şirkət, həmçinin qurğuların layiləşdirilməsini aparır ki, bu da atmosferə buraxılan karbon qazını tutacaq. Bu qaz metanolun istehsalında xammal kimi istifadə oluna bilər.
Metanol zavodunun tikinti layihəsinin ümumi dəyəri 360 milyon dollar təşkil edib və bu gün layihənin maliyyələşdirilməsi artıq başa çatıb.
Metanol zavodu Cənubi Qafqazda və Orta Asiyada yeganə zavod olacaq.
"AzMeCo" 2007-ci ildə yaradılıb. Şirkət öz portfelinə Xəzər hövzəsindəki beynəlxalq karbohidrogen layihələrinin əlavə edilməsi ilə Azərbaycanın qeyri-neft sektoruna investisiya qoyuluşunun baş planını hazırlayıb.
