Azərbaycan, Bakı, 24 yanvar /Trend, müxbir N.İsmayılova/
2011-ci il ərzində Azərbaycan bankı "AtaBank"ın aktivləri 7,4 faiz artaraq bu ilin yanvarın 1-nə olan vəziyyətə görə 231,016 milyon manat təşkil edib. Trend-in məlumatına görə, bu barədə çərşənbə axşamı bankın balans hesabatında qeyd edilir.
İl ərzində "AtaBank"ın kredit portfeli təxminən 6 faiz artaraq 146 704,2 milyon manata çatıb. Bankın öhdəliyi 7,3 faiz artaraq 199,2 milyon manatı ötüb.
Hesabat dövrü ərzində fiziki şəxslərin depozitləri 22,8 faiz artaraq 113,73 milyon manat təşkil edib. 2011-ci ilin sonuna qədər bakın xalis gəliri 3,11 milyon manat olub. Bankın nizamnamə kapitalı 25 milyon manat səviyyəsindədir.
1993-cü ildən uğurla fəaliyyət göstərən "AtaBank" Azərbaycanın ən iri kommersiya banklarından biridir. Bankın əsas səhmdarı "AtaHoldinq"dir. Bankın səhmlərinin 76 faizi "AtaHoldinq"ə, qalan 24 faiz isə Azərbaycan vətəndaşları olan iki fiziki şəxsə məxsusdur.
Yanvarın 24-nə olan rəsmi məzənnə 0,7862 AZN/USD təşkil edir.
