Azərbaycan, Bakı, 25 yanvar /Trend, müxbir A.Axundov/
Son illər Bakıda ilkin mənzil alıcıları üçün qiymət məsələsi ikinci plana keçir. Bu barədə çərşənbə günü Trend-ə "Əmlak Bazarı İştirakçıları" İctimai Birliyindən məlumat veriblər.
"Son illər ərzində aparılan araşdırmalar göstərir ki, alıcı ilk növbədə binanın tikintisinin hansı mərhələdə olmasına, mülkiyyət hüququnu təsdiq edən sənədlərin mövcudluğuna, əmlakın yerləşdiyi ərazinin infrastrukturuna, sonra qiymətinə və digər texniki göstəricilərinə fikir verir", - İB-dən bildiriblər.
2011-ci ildə satışdan çıxarılan ilkin mənzil bazarındakı binaların sayı 2010-cu ildəki 22 ədədə qarşı 20 ədəd olub. Qiymətlər azalan istiqamətdə davam etsə də, bazarda əsasən sabitlik müşahidə edilib. 2011-ci ildə satışa 9 yeni tikili çıxarılıb.
"Ötən il ölkənin sosial həyatında baş verən proseslər yeni infrastruktur layihələrin həyata keçirilməsinə zəmin yaradıb. Biznes mərkəzlər, hotellər, istirahət mərkəzləri, parkların salınması sürətli inşa mərhələsinə qədəm qoyub. Onlardan bəziləri isə artıq istismara verilib. Belə bir tendensiya Bakının ilkin daşınmaz əmlak bazarına təsir edib. Hələ ötən illərdən müəyyən səbəblərdən yarımçıq qalan və ya inşası zəif gedən yaşayış binaları istismara verilib", - təşkilatdan deyiblər.
2011-ci ildə bahalı yeni tikililərin ekspozisiya müddəti yüksək olaraq qalıb. Bunu belə tip mənzillərin qiymətlərinin və təklif həcminin bazarın real tələbinə cavab verməməsi ilə əlaqələndirmək olar.
"İstər mənzil tikintisi sektorunda, istərsə də əqdlərin bağlanmasında baş verəcək dəyişikliklər növbəti mərhələdə əsasən dünya bazarında enerjidaşıyıcıların qiymətlərinin dəyişməsindən asılı olacaq. Çünki hazırda bir çox ölkələrdə daşınmaz əmlak bazarında baş verən proseslərin sabit qalması tendensiyası davam edir", - təşkilatın ekspertləri hesab edirlər.
