Azərbaycanın Xocavənd rayonunun inkişafı üçün investisiya layihələrinin qəbulu elan edilib
Azərbaycan, Bakı, 27 yanvar /Trend, müxbir N.İsmayılova/
Azərbaycan İqtisadi İnkişaf Nazirliyi yanında Sahibkarlığa Kömək Milli Fondu (SKMF) Xocavənd rayonunda prioritet sahələrinin maliyyələşdirilməsi məqsədilə sahibkarlıq subyektlərindən investisiya layihələrinin qəbulunu elan edib. Trend-in məlumatına görə, bu barədə cümə günü nazirliyin məlumatında deyilir.
Yanvarın 24-də Xocavənd rayonunun Xocavənd qəsəbəsində "Sahibkarlığın inkişafına dövlət dəstəyi" mövzusunda keçirilən tədbir çərçivəsində yerli icra hakimiyyəti orqanlarının nümayəndələri və sahibkarlarla mövcud iqtisadi potensialdan daha səmərəli istifadə edilməsi məqsədilə müzakirələr aparılıb. Nəticədə rayonun inkişafı üçün aşağıdakı prioritet istiqamətlər müəyyən edilib:
- cins heyvandarlıq təsərrüfatının yaradılması;
- çörək istehsalı müəssisəsinin yaradılması;
- tikiş sexinin yaradılması;
- plitə daşları (tamet) istehsalı sexinin yaradılması.
Bu gündən etibarən SKMF-in müvəkkil kredit təşkilatları vasitəsilə sahibkarlıq subyektlərindən təkliflərin qəbulu başlanıb.
Əlavə məlumat üçün Sahibkarlığa Kömək Milli Fonduna müraciət etmək olar. Ünvan: Bakı şəhəri, Yasamal rayonu, A.M.Şərifzadə küçəsi, 172; telefon: (012) 434-74-29; faks: (012) 432-37-17; e-mail: [email protected]
