Azərbaycan, Bakı, 9 aprel /Trend/
İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti geyim, parfümeriya və kosmetika mallarının satışı ilə məşğul olan təsərrüfat subyektlərinin nəzərinə bir daha çatdırır ki, qeyri-dəqiq və bilərəkdən yalan reklamların yayımlanması qadağandır.
"Reklam haqqında" Azərbaycan Respublikasının Qanununa əsasən, reklamın yayımı anında əmtəənin dəyəri (qiyməti) barədə həqiqətəuyğun olmayan məlumatları əks etdirən reklam qeyri-dəqiq, istehlakçını qəsdən yanlış istiqamətləndirən reklam isə bilərəkdən yalan reklam hesab olunur. Qeyri-dəqiq və bilərəkdən yalan reklamların yayımlanması qadağandır. Bu barədə bazar ertəsi Trend-ə İqtisadi İnkişaf Nazirliyindən məlumat verilib.
"Haqsız rəqabət haqqında" Azərbaycan Respublikasının Qanununa görə, əmtəənin alınması, yaxud sövdələşmə zamanı istehlakçının seçim sərbəstliyinə təsir göstərən qanunsuz reklam üsullarından istifadə olunması istehlakçıların çaşdırılmasına və nəticədə haqsız rəqabətə səbəb olur. Bu hərəkətlərə görə bazar subyektlərinə haqsız rəqabət fəaliyyəti göstərilən dövrdə əldə edilmiş ümumi gəlirin 10 faizinədək, bundan sonrakı il ərzində bu hərəkətə təkrar yol verdikdə isə 20 faizinədək maliyyə sanksiyası tətbiq olunur.
Dövlət Xidməti qeyd olunan qanun pozuntusu hallarına yol verilməməsi üçün aşağıdakıları bildirir:
- endirim kampaniyaları "Reklam haqqında" Azərbaycan Respublikasının Qanununun tələblərinə riayət edilməklə həyata keçirilməli;
- satışda olan malların üzərində malın adı, növü və qiyməti, qiymət kağızının arxa tərəfində isə maddi-məsul şəxsin imzası və onun doldurulma tarixi göstərilməli;
- endirim tətbiq edilən malın üzərində ilkin və endirimdən sonrakı qiymətlər göstərilməli;
- endirimlərlə bağlı reklamların yayımlanması üçün aidiyyatı strukturlardan icazə alınmalı;
- endirimlərlə əlaqədar yayımlanan reklamlarda endirim tətbiq olunan malların əhatə dairəsi (bütün mallara, bir qrup mala yaxud bir mala və s.) dəqiq göstərilməli;
- tətbiq olunan endirim faizləri reklamda konkret göstərilməlidir.
Əlavə məlumat əldə etmək üçün İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə müraciət etmək olar (əlaqə telefonları: 498-15-01 və 498-15-04).