Azərbaycan, Bakı, 13 aprel /Trend, müxbir A.Axundov/
Tikinti və Şəhərsalma Məcəlləsi layihəsinə əsasən, Azərbaycanda məlumatlar toplusu və layihə sənədlərinin hazırlanması tikintiyə icazə vermə prosedurundan ayrılacaq.
Trend-in məlumatına görə, bu barədə cümə günü Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov Tikinti və Şəhərsalma Məcəlləsi layihəsi üzrə keçirilən ictimai dinləmələr zamanı bildirib.
"Məcəllə layihəsinə əsasən, torpaq sahəsinə və orada hər hansısa obyekt tikmək istəyinə malik hər bir investor, sifarişçi müvafiq orqanlara müraciət edə və mövcud sahədə tikinti üçün tələblər haqqında və digər məsələlər üzrə sərbəst şəkildə məlumat ala bilər", - Əsədov deyib.
Onun sözlərinə görə, tikintiyə icazə verən orqan yanında maraqlanan şəxslərə bu məlumatı bəzi hallarda pulsuz, digər hallarda isə dövlət rüsumunun ödənilməsi şərtilə təqdim edən idarə yaradılacaq.
"Bu məlumatların toplanmasından və layihə sənədlərinin hazırlanmasından sonra investor bu sənədləri icazə verən orqana təqdim edir. Məhz bu andan etibarən icazə vermə prosesi və "bir pəncərə" prinsipi işləməyə başlayır. İcazə vermə prosesi üç aydan çox davam etmir", - Əsədov qeyd edib.
Onun sözlərinə görə, bu gün tikintiyə icazəni yerli icra hakimiyyəti verir, tikintiyə nəzarəti icra hakimiyyəti orqanlarının arxitektura-tikinti bölmələri və Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi həyata keçirir, yaşayış binaları və sosial obyektlərin istismarına icazəni yerli icra hakimiyyəti tərəfindən yaradılan strukturlar verir.
"Tikintiyə icazə verən və artıq hazır obyektləri istismar etməyə imkan verən dövlət orqanları bizim qanunvericilik praktikamızda qanun layihələrində heç vaxt göstərilmir, bu qanunun təsdiq edilməsi haqqında prezidentin fərmanı ilə müəyyənləşdirilir" , - Əsədov deyib.
