Azərbaycan, Bakı, 25 aprel /Trend, müxbir A.Tağıyeva/
Dubay investisiya korporasiyası yaxın vaxtlarda Azərbaycana ikinci nümayəndə heyətini göndərməyi planlaşdırır. Səfər çərçivəsində əməkdaşlığın istiqamətləri konkretləşdiriləcək. Bu barədə çərşənbə günü Trend-ə korporasiyadan bildiriblər.
"Bizim ilk səfərimiz Azərbaycan ilə tanışlığa və əməkdaşlıq üçün perspektiv sahələrin aşkar edilməsinə yönəlmişdi. İkinci səfər çərçivəsində əməkdaşlığın təfərrüatlarını daha ətraflı müzakirə edəcəyik", - korporasiyadan deyiblər.
Korporasiyada Azərbaycan ilə əməkdaşlıq üçün perspektiv sahələr arasında turizm sektorunu önə çıxarıblar.
Ötən həftə baş tutan səfər zamanı investisiya korporasiyasının nümayəndə heyəti Qəbələdə fəaliyyət göstərən bir sıra müəssisə və mehmanxanalara baş çəkib və bu şəhərdə turizm sahəsinin cari vəziyyyəti ilə tanış olub.
"Biz Azərbaycanda rəsmi şəxslər və sahibkarlarla bir sıra görüşlər keçirdik və Azərbaycan ilə əməkdaşlığa maraq göstəririk", - korporasiyadan deyiblər.
