Azərbaycan, Bakı, 5 iyun /Trend, müxbir A.Axundov/
Azərbaycanın Standartlaşdırma, Metrologiya və Patent üzrə Dövlət Komitəsi ilin sonunadək təqribən 1000 milli standart qəbul etməyi planlaşdırır. Trend-in məlumatına görə, bu barədə çərşənbə axşamı jurnalistlərə Komitənin sədri Ramiz Həsənov bildirib.
"Hər sahə üzrə təqribən 100 standart qəbul etməyi planlaşdırırıq ki, bu da ümumilikdə 1000-ə yaxın təşkil edəcək", - Həsənov deyib.
Onun sözlərinə görə, bu standartlar Avropa və ABŞ-ın analoji standartlarının öyrənilməsindən sonra qəbul ediləcək.
"Bundan başqa, biz köhnə standartları yenidən nəzərdən keçiririk. Onlardan bəziləri artıq özünü doğrultmur və onları ləğv edirik", - Həsənov vurğulayıb.
Komitənin standartlar fondunda bu gün təqribən 21 min standart mövcuddur, onlardan 660-ı milli standartdır.