Azərbaycan, Bakı, 21 iyun /Trend, müxbir Ə.Həsənov/
İyunun 20-nə olan məlumata görə, keçmiş SSRİ Əmanət Bankının Azərbaycan Respublikası Bankının 1992-ci il yanvarın 1-nə olan vəziyyət üzrə 63 167 əmanətçisinə birdəfəlik fərdi ödənişlər qismində 37 milyon manat ödənilib. Trend-in məlumatına görə, bu barədə cümə axşamı jurnalistlərə "Kapital Bank"ın idarə heyətinin sədr müavini Araz Əliyev bildirib.
"İyunun 20-dək keçmiş AzSSR Əmanət Bankının varisi olan "Kapital Bank"a ümumilikdə 177 462 müraciət daxil olub, onlardan 105 507-si artıq baxılması üçün bankın nəzdindəki əmanətçilərə birdəfəlik fərdi ödənişlər mərkəzinə göndərilib", - Əliyev deyib.
Onun sözlərinə görə, bankda hər gün 14-15 min müraciətə baxılır. Əmanət kitabçasının itməsi və ya korlanması ilə bağlı daxil olan müraciətlərin sayı 3140 olub, ödənişlərə görə imtina edilən şəxslərin sayı isə 8 mindir.
Bank yerlərdə korrupsiya faktlarından yayınmaq üçün kadrların rotasiya siyasətini yürüdür. Bununla da bankın əməkdaşı bir yerdə 10 gündən çox qalmır, ödənişlər üzrə bütün məlumatlar vahid kompüter şəbəkəsində yerləşdirilib.