Azərbaycan, Bakı, 10 sentyabr /Trend, müxbir A.Axundov/
Ümumdünya Ticarət Təşkilatının (ÜTT) bu ilin dördüncü rübünə dair fəaliyyət proqramına Azərbaycanın təşkilata üzv qəbul edilməsi üzrə işçi qrupu ilə görüş daxil edilib.
Bu barədə Trend-ə bazar ertəsi Azərbaycan xarici işlər nazirinin müavini Mahmud Məmmədquliyev deyib.
"Görüş noyabrın son həftəsinə nəzərdə tutulub. Bu səbəbdən də görüşə maksimum 4-6 həftə qalmış ÜTT-yə üzv ölkələrin suallarına, danışıqlar üzrə təkliflərə və s.-ə cavablar göndərməliyik. Cavablar üzərində iş başa çatmaq ərəfəsindədir və sentyabrda cavabları göndərəcəyimizi düşünürəm", - Məmmədquliyev qeyd edib.
Onun sözlərinə görə, işçi qrupu ilə görüşlə yanaşı, habelə kənd təsərrüfatı üzrə ikitərəfli və çoxtərəfli danışıqlar aparılacaq.
"Biz danışıqlar apardığımız bütün ölkələrə təkliflər göndərəcəyik. ABŞ, Aİ və s. ölkələrlə görüşlərin keçirilməsi mümkündür", - Məmmədquliyev deyib.
