Azərbaycan, Bakı, 11 sentyabr /Trend, müxbir H.Vəliyev/
Yaxın vaxtlarda Paypoint özünəxidmət terminallarının sayı daha 200 ədəd artırılacaq. Trend-in məlumatına görə, bu barədə jurnalistlərə "Goldenpay" şirkətinin rəhbəri Fərid İsmayılzadə bildirib.
Onun sözlərinə görə, hazırda Bakıda quraşdırılan ödəniş terminallarının ümumi sayı təxminən 460 ədəd təşkil edir.
Paypoint terminalları kommunal xidmətlərin, stasionar və mobil telefoniya xidmətlərinin, internet, kabel televiziyası ödənişi üçün nəzərdə tutulub. Terminallar həmçinin qazdan istifadəyə görə ödəniş üçün istifadə edilən SMART kartların yükləməsi üçün də qurğularla təchiz edilir.
Həmçinin yaxın vaxtlarda yol hərəkəti qaydalarının pozulmasına görə cərimələrin və bank kreditlərinin ödənişi xidmətləri də mümkün olacaq.
