Azərbaycan, Bakı, 11 sentyabr /Trend, müxbir A.Axundov/
"Paşa Bank" 2012-ci ilin sonunadək Gürcüstanda törəmə bank (PASHA Bank Georgia) açmağı planlaşdırır. Bu barədə Trend-ə bankın idarə heyətinin sədri Fərid Axundov bildirib.
"Hazırda infrastruktur işləri, işçi heyətin seçimi və hazırlığı aparılır. İlin sonunadək törəmə bankımızı açmaq niyyətindəyik", - Axundov deyib.
Ötən ilin yayından Gürcüstan bazarında "Paşa Bank"ın nümayəndəliyi fəaliyyət göstərir. Həmin nümayəndəliyin əsasında törəmə bank formalaşdırılacaq.
Axundovun sözlərinə görə, bank həmçinin İsveçrədə nümayəndəliyin açılmasına dair işləri davam etdirir.
"Hazırda bu bazarı öyrənirik və mövcud proses artıq uzun müddətdir davam edir. Biz tələsmirik, Azərbaycan və İsveçrədə müştəri bazasını genişləndiririk, yəni hüquqi, maliyyə, təşkilati hazırlıq işləri aparılır. Hazırda əməkdaşlarımız treninq keçirlər. Məqsədimizə çatmayacağımız barədə düşünməyə səbəb yoxdur", - Axundov vurğulayıb.